श्री चक्रमान स्मृति प्रतिष्ठानया ग्वसालय् राष्ट्रिय आधारभूत विद्यालयसं स्कूल व्याग इनेगु ज्या याःगु दु ।
समाजसेवी चक्रमान डंगोलया गुक्वःगु पुण्यतिथिया लसताय् उगु ब्वनेकुथिइ ब्वनाच्वपिं १३५ म्ह ब्वमिपिन्त स्कुल व्याग लःल्हागु खः ।
येँ मनपा १२ वडाया नायः बालकृष्ण महर्जनया मूपाहाँसुइ जूगु ज्याझ्वलय् नुगःखँ तयादिसें वडा अध्यक्ष महर्जनं चक्रमान डंगोलया प्रेरणां हे थःपिं राजनीति ख्यलय् न्ह्यज्याःवयागु खँ तयादिल । समाजसेवी डंगोलया लुमन्तिइ स्वनातःगु प्रतिष्ठानपाखें मदिक्क ज्या याय्त इनाप यासें प्रतिष्ठानं न्ह्याकीगु ज्यायात थःगुपाखें फुचाः कथं ग्वाहालि याय्गु बचं वियादिल ।
वय्कलं राष्ट्रिय आधारभूत ब्वनेकुथिया प्रगति सन्तोषजनक मदुगु खँ तयादिसें ब्वनेकुथिया स्तर उन्नति याय्त विद्यालय व्यवस्थापन समिति व शिक्षकपिन्त माःकथंया ज्या न्ह्याकेत इनाप यानादिसें छगू इलय् मेगु हे ब्वनेकुथिलिसे ल्वाक छ्यायेगु (मर्ज यायेगु) खँ तकं वये धुंकूगु ब्वनेकुथियात स्थानीय मस्तय्गु निंतिं आवश्यक जूगु तायेकाः ल्वाक छ्याके मबियागु खँ तयादिसें वय्कलं विद्यालयया स्तरवृद्धिया निंतिं नं वडापाखें माःकथं ग्वाहालि यायेगु खँ तयादिल ।
वय्कलं ब्वनेकुथि न्ह्यःने दुगु इचंगु नारायणया देगः पुनःनिर्माणया निंतिं थः निर्वाचित जुइ न्ह्यः हे खँ तयागु व आः उकिया मूर्तरुप काइगु ई वःगु धयादिल । येँ महानगरपालिकां उगु देगः दय्केगु निंतिं थुगुसी डीपीआर तयार याइगु जूगु दु ।
प्रतिष्ठानया नायः न्हुछे महर्जनया सभापतित्वय् जूगु ज्याझ्वलय् येँ मनपा १२ वडाया दुजःपिं पुष्परत्न प्रजापति, नानिहेरा डंगोल, स्थानीय समाजसेवी अमिरमान डंगोल, ब्वनेकुथिया प्रधानाध्यापक नमिता राजभण्डारी, विद्यालय व्यवस्थापन समितिया अध्यक्ष मंगलकृष्ण श्रेष्ठपिसं नुगःखँ तयादीगु खः ।
ज्याझ्वः प्रतिष्ठानया छ्याञ्जे चमितमान डंगोलं न्ह्याकूगु खः ।
