नेवाः देय् दबूया ३० क्वःगु बुसादँया लसताय् थुगुसी नं दँय्दसं थें छगू छगू लख तकाया स्वंगू सिरपाः लःल्हाइगु जूगु दु ।
थ्व हे भाद्र २५ गते शनिवाः जुइगु ज्याझ्वलय् लःल्हाइगु नारायणदेवी तीर्थ नेवाः समाजसेवा सिरपा, नारायणदेवी तीर्थ व्यवसायी प्रोत्साहन सिरपा व गिरिधरलाल नेपालभाषा सेवा सिरपा लःल्हाइगु जूगु दु । थुगु सिरपा बियेत ल्वःगु खलःपुचः, संघसंस्था व व्यक्तियात थ्व हे ने.सं. ११४४ गुंलागा चौथी (भाद्र ७/अगष्ट २३) दुने सिफारिस वा दाबी सहित निवेदन तयादिइत दक्व खलःपुचः, संघसंस्था, व्यक्तिपिन्त दबूपाखें इनाप याःगु दु ।
दबूपाखें लःल्हाना वयाच्वंगु नारायणदेवी तीर्थ नेवाः समाजसेवा सिरपा नेवाः सामाजिक, संस्कृति, अधिकार, सम्पदा, संरक्षण नापं स्वापू दूगु ज्याय् च्वछायेबहःगु ज्या याना वयाच्वंगु संघसंस्था, खलःपुचः, गुथि, व्यक्ति आदिपिन्त लःल्हाइगु सिरपाः खः ।
थुकथं हे नारायणदेवी तीर्थ व्यवसायी प्रोत्साहन सिरपा नेवाः परम्परागत व्यवसाय वा आधुनिक व्यवसाय न्ह्याका वयाच्वंगु व्यवसायिक संस्था, कम्पनी, खलःपुचः, गुथि, उद्यमी, व्यक्तिपिन्त लःल्हाहइगु सिरपाः खः सा गिरिधरलाल नेपालभाषा सेवा सिरपा नेपालभाषा, नेपालभाषा साहित्य व नेपाल लिपि ख्यलय् च्वछायेबहःगु ज्या याना वयाच्वंगु संघसंस्था, खलःपुचः, गुथि, व्यक्ति आदि पिन्त लःल्हाइगु खः ।
सिरपाया नितिं नेवाः देय् दबूनापं आवद्ध गुगु नं संस्था, नेवाः देय् दबूया कचा वा व्यक्तिं सिफारिस वा दाबी यायेफइ ।
थुकथं हे गुगु नं संस्था वा व्यक्तिं थःम्हं हे सिरपा दाबी यायेफइ । सिरपाया लागि दाबी वा मनोनयन यायेबलय् सिरपाया बिधा अनुसारया च्वछायेबहःगु योगदान बियावयाच्वंगु खः धइगु पुष्टि सहित यायेमाः ।
थथे सिफारिस वा दाबी यायेबलय् छम्ह व्यक्ति व संस्थां छगू विधाय् छम्हसित वा छगू संस्थायात जक सिफारिस यायेफइगु व्यवस्था दु ।