कन्हय्निसें न्ह्यायेत्यंगु निन्हुया स्वक्वःगु लगानी सम्मेलनय् ब्वति कायेगु निंतिं नेपालं व पिनेया देसं यानाः द्वःछि व खुसलं मल्याकसिनं ब्वति काइगु जूगु दु । लगानी बोर्डया ज्याकुथिं ब्यूगु विवरणकथं सम्मेलनया निंतिं निद्वः व प्यसः मनूतय्त ब्वनापौ छ्वःगु खः ।
थीथी ५५ देय्या लगानीकर्ता सम्मेलनय् ब्वति कायेगु निंतिं नेपाः वइगु जूगु दु । सम्मेलनय् नेपाःया स्वसः व ८५ म्हेसिनं ब्वति काइगु जुइधुंकूगु दुसा चीनया निसः व ६५, भारतया सच्छि व ४३, संयुक्त राज्य अमेरिकाया ३३, जापानया २८, संयुक्त अधिराज्यया १४, बङ्गलादेशया १३, संयुक्त अरब इमिरेट्स (युएई) या १३ व जर्मनीया १० म्हेसिनं ब्वति काइगु जूगु दु ।
दक्षिण कोरिया, अस्ट्रेलिया व मलेसियाया गुम्ह–गुम्हेसिनं ब्वति काइगु लगानी बोर्डं धाःगु दु ।
पाकिस्तानं च्याम्ह, सिङ्गापुरं खुम्ह, कतार व घानां न्याम्ह-न्याम्ह, साउदी अरब, फ्रान्स व बहराइनं प्यम्ह प्यम्हसिया ब्वति दइगु जूगु दु । थुकथं हे स्विजरल्यान्ड, फिनल्यान्ड, रुस, अस्ट्रिया, श्रीलङ्का व कोलम्बियाया स्वम्ह–स्वम्ह सम्मेलनय् ब्वति कायेत नेपाः वयेत्यंगु दु ।
फिलिपिन्स, कुवेत, क्यानडा, मौरिसस, बेलारुस व बेल्जियमपाखें निम्ह निम्ह वइगु जूगु दुसा इजिप्ट, नर्वे, इटाली, सेनेगल, नेदरल्यान्ड, पोल्यान्ड, इन्डोनेसिया, ताजकिस्तान, दक्षिण अफ्रिका, रोमानिया, मेक्सिको व साइप्रसपाखें नं सम्मेलनय् ब्वति काइगु जूगु दु ।
आयरल्यान्ड, स्लोभेनिया, भियतनाम, बोस्निया, मोरक्को, टर्की, भानुआटु, मौरिटानिया व हङकङपाखें नं सम्मेलनय् ब्वति काइगु बोर्डं धाःगु दु ।
कन्हय्निसें येँय् जुइगु उगु सम्मेलनया निंतिं सच्छि व ५० गू आयोजना सोकेसय् तइगु जूगु दुसा सम्मेलनस्थलय् २३ प्रदर्शनी कक्ष (स्टल) तइगु जूगु दु ।
सम्मेलनया झ्वलय् थीथी १९ परियोजनाया निंतिं आशयपत्र आह्वान याये त्यंगु दु । आशयपत्र आह्वान याइगु, सोकेस याइगु, मार्केट साउन्डिङ याइगु व निजी क्षेत्रपाखें यानाः मुक्कं सच्छि व ५० परियोजना न्ह्यब्वइगु जूगु दु ।
न्हापांगु न्हि उद्घाटन सत्र व निगु मू सत्र दइ । कन्हय् खुन्हु ११ समानान्तर सत्र न्ह्याइगु बोर्डं धाःगु दु ।