बैंकिङ क्षेत्रया समग्र सुधार व सुदृढीकरणया निंतिं सुझाव बीगु निंतिं डा. रेवतबहादुर कार्कीया संयोजकत्वय् नेपाल राष्ट्र बैंकं छगू कार्यदल स्वंगु दु ।
उगु कार्यदलय् पुलांम्ह बैंकर भुवनकुमार दाहाल दुजः जुइगु जूगु दु । अथे हे नेपाल राष्ट्र बैंकया बैंकिङ्ग तथा वित्तीय संस्था नियमन विभागया कार्यकारी निर्देशकयात सदस्य सचिव दयेकाः स्वम्ह दुजः दुगु बैंकिङ्ग क्षेत्र सुधार सुझाव कार्यदल गठन याःगु दु । कार्यदलया म्याद लच्छि दु ।
कार्यदलयात बैंकिङ्ग नीति नियमनयात उदार तर विवेकशील, जोखिमय् आधारित प्रभावकारी पर्यवेक्षण व ग्राहक अनुकूल बैंकिङ्ग सेवा विकास यायेगु जिम्मेवारी ब्यूगु दु ।
अथे हे आर्थिक गतिविधियात पूर्ण रुपं व्यवहारिक दयेकेगु निंतिं बैंकिङ्ग क्षेत्रं म्हितेमाःगु भूमिका, ग्रामीण क्षेत्रय् ऋण प्रवाहयात प्रभावकारी यायेत ल्ह्वनेमाःगु पलाः, बैंक व वित्तीय संस्थाया मर्जर व अधिग्रहण, उगु ज्या लिपाया समस्या पहिचान व समाधानया निंतिं सुझाव बीत धाःगु दु ।
अथे हे नेपाःयात ग्रे धलखं लिकायेत बैंकिङ्ग क्षेत्रं म्हितेमाःगु भूमिका व पूँजी बजार विकासय् केन्द्रीय बैंकया समन्वयात्मक भूमिकायात कयाः सुझाव इनाप यानागु खँ गभर्नरया ज्याकुथिं न्ह्यथंगु दु।