संखुवासभाया मकालु गाउँपालिकाय् दयेकाच्वंगु गुसः मेगावाट क्षमताया अरुण तेस्रो जलविद्युत् आयोजनाया ज्या ८० प्रतिशत सिधयेधुंका प्यसः छेँजःतय्सं ल्यंदनिगु जग्गाया क्षतिपूर्ति कायेखनीगु जूगु दु ।
जिल्ला प्रशासन ज्याकुथि संखुवासभापाखें २०७९ चैत २३ गते पिकाःगु सुचं कथं लच्छिया दुने द्यबा बिइत सर्वाेच्च अदालतपाखें वंगु पुस ११ गते परमादेश जूगु दु । उगु इलय् जिल्ला प्रशासन ज्याकुथिं छ्याङ्कुटीं विद्युत् गृहतक दुहाँ वनिगु लँपुइ २४ किलोमिटर लँया न्यासः व नीप्यपी बुँया क्षतिपूर्ति छपीया ११ लख ७५ द्वःया ल्याखं क्वःछिना ब्यूगु खः । प्रशासनया धरौटी खाताय् पीडितया निंतिं ‘अरुण–३ पावर डेभलपमेन्ट कंपनी लिमिटेड’ नं तुरुन्त हे ५३ क्वःति द्यबाः मुंकाब्यूगु खः ।
आयोजना दुहाँ वनेगु लँपुइ थ्यंमथ्यं प्यसः छेँजःया छेँबुँ लाःगु दु । सर्वाेच्चया परमादेशलिपा गृह मन्त्रालययात पौ छ्वःगु प्रमुख जिल्ला अधिकारी विनोदकुमार खड्कां धयादिल । विसं २०८१ जेठ २२ गते अरुण तेस्रो जलविद्युत् आयोजनाया मू सुरुङमार्गया ब्रेक थ्रु यानाः सुरुङमार्गया ज्या सिधःगु घोषणा याःगु खः ।