सरकारं सहकारीपीडितया माग पूवंकेत आः दूगु कानुनयात याकनं हे संशोधन यायेत्यंगु दु ।
भूमि व्यवस्था, सहकारी नापं गरिबी निवारण मन्त्रालयं थुगु ख्यःया समस्या ज्यंकेत आः दूगु कानुनय् मगाःमचाःगु ऐन, नियम, कार्यविधि दयेकाः कानुन परिमार्जनया प्रक्रिया न्ह्याकूगु खः ।
मन्त्रालयया सहसचिव नापं प्रवक्ता गणेशप्रसाद भट्टया कथं परिमार्जित विधेयक मन्त्रिपरिषदय् छ्वयेगु व उकियात सरकारं अध्यादेशपाखें जारी यायेत ज्या यानाच्वंगु दु ।
कर्जा सूचं केन्द्र, बचत नापं सुरक्षण कोष, बचत नापं ऋण असुली न्यायाधीकरण व नियामक निकाययात माःगु अधिकारया व्यवस्था यानाः कार्यविधि दयेकूगु वय्कलं धयादीगु खः ।
कानुनविद्, स्वापू दुपिं पक्षतलिसे खँल्हाबल्हा यानाः विधेयक दयेकूगु खः ।
संशोधन जुइगु कानुनय् समस्याग्रस्त सहकारी नापं आर्थिक अपचलन यानाः ठगे याःगु सम्बन्धित सहकारीया सम्पत्ति लिलाम नापं जफत यानाः पीडिततय्त इमिगु निक्षेप अनुपातं ध्यबा बियाः न्याय बिइगु विषययात प्राथमिकताय् तयातःगु दु ।
सहकारी सिद्धान्तकथं सहकारी सङ्घसंस्थाया स्व–नियमनकारी प्रक्रिया बल्लाकूगु कार्यविधिइ सहकारी विकासया निंतिं सङ्घीय, प्रान्तीय व स्थानीय सरकारया क्षेत्राधिकारयात बः ब्यूगु दु ।
सङ्घीय सरकारं प्रान्तीय व स्थानीय सरकारया सहकारी निकायतय्त माःगु नियामक, प्रवद्र्धनात्मक व प्रशिक्षणलिसेंया सेवात बिइगु याइ । सहकारीइ बचतकर्ताया निक्षेप कायेमफुसां नं कानुन मगाःगुलिं पीडकपाखें सम्पत्ति असुली यानाः पीडिततय्त निक्षेप लित बिइमफूगु खः ।
चीधंपिं किसान, श्रमिक, उपभोक्ता व गरीबत मुनाः दक्व प्रदेश, जिल्ला व नगरपालिका वा गाउँपालिकाय् न्ह्याकाच्वंगु ३४ द्वः स्वयां अप्वः सहकारी संस्था दूगु खँ न्ह्यथनातःगु दु ।
थ्यंमथ्यं ७० लख मनू थुगु ख्यलय् जुयाच्वंगु धयातःगु दु ।