अर्थशास्त्री प्रा डा विश्वम्भर प्याकुरेलं नेपाःया ग्यसुलाःगु आर्थिक विकासया निंतिं नीति सुधारय् बः बीमाःगु खँ कनादीगु दु ।
इम्बार्क कलेजया इम्बार्क रिसर्च नेटवर्कं पिथंगु सफू ‘इम्बार्क रिसर्च रिभ्युः दिगो नेपालको बाटो–दिगोपन र आर्थिक समावेशीकरणमा नेपालका नीतिगत चुनौतीहरू’या विमोचन ज्याझ्वलय् वय्कलं थथे धयादीगु खः ।
स्थिरता व वित्तीय समावेशीकरण नीतिगत समाधानया कथं अनुसन्धान खँचुइ ग्वसाःग्वःगु बहस सत्रय् अर्थशास्त्री प्याकुरेलं धयादिल, “वित्तीय पहुँच व समावेशीकरणयात प्रवर्धन यायेत डिजिटल प्रविधि व नवीन वित्तीय उपकरणतय्गु महत्व न्ह्यब्वसें ग्यसुलाःगु आर्थिक विकासया निंतिं नीति सुधारय् बः बी माः ।”
नेपाल धितोपत्र बोर्ड (सेबोन)या कार्यकारी निर्देशक डा नवराज अधिकारी, काठमाडौँ फिनटेकया संस्थापक डा सञ्जीव सुब्बा लिसेंया पिनि ब्वति दुगु बहस सत्रं नेपाःया आर्थिक विकासय् वित्तीय समावेशीकरण व स्थिरताया भूमिका स्पष्ट यासें नीतिगत दिशानिर्देशत तयार याय्त महत्वपूर्ण सुझावत ब्यूगु दु ।
थुगु हे लसताय्, इम्बार्क कलेजया प्रिन्सिपल डा स्टिफन ड्रिभर, कलेजया कार्यकारी निर्देशक आशिष ठाकुरं कलेजया उद्देश्य, शिक्षा व अनुसन्धानपाखें ग्यसुलाःगु नेपाः दयेकेत कलेजया प्रतिबद्धता व युनिभर्सिटी अफ रोहम्प्टनलिसेया अन्तर्राष्ट्रिय सहकार्यं हःगु न्हूगु नीति व ज्याझ्वःतय्गु महत्वयात कयाः खँ तयादिल ।