स्वतन्त्र ऊर्जा उत्पादकतय्गु संस्था, नेपाल (इप्पानं) टेक एन्ड पे नीतिइ विद्युत् खरिद सम्झौता यायेबलय् लाय् जोखिमय् लाइगु धासें असन्तुष्टि प्वंकूगु दु ।
येँय् ग्वसाः ग्वःगु पत्रकार सम्मेलनय् इप्पानया नायः गणेश कार्कीं टेक एन्ड पे जक विद्युत् खरिद सम्झौता यायेबलय् जलविद्युत् आयोजनाया ६६ अर्ब २२ क्वःति तकाया लाय् जोखिमय् लाइगु दाबी यानादिल । वय्कलं उगु व्यवस्थां तःधंगु समस्या हइगु धयादिल ।
सरकारं सार्वजनिक याःगु आः वइगु आर्थिक दँ २०८२/८३ या वार्षिक बजेटय् टेक एन्ड पे नीति न्ह्यथना तःगु दु । नायः कार्कीं सरकारया उगु नीतिं निजी लगानीकर्तायात समस्या जुइगु धासें नीति भिंकेत माग यानादीगु दु । सरकारं आः वइगु आ.व.या निंतिं विनियोजित बजेटय् रन अफ दि रिभर (आरओआर) आयोजनाया हकय् टेक एन्ड पे जक विद्युत् खरिद सम्झौता (पीपीए) यायेगु, ऊर्जा उत्पादन व खपतया सन्तुलनया लिधंसाय् जक पीपीए यायेगु घोषणा याःगु खः ।
नायः कार्कीं धयादिल, “न्हापा निजी ख्यःयात लगानी यायेत हःपाः बिसें ऊर्जा ख्यलय् लगानी या धायेगु व आः वयाः उत्पादन याःगु विद्युत् न्याये मखु धायेगु ज्या सरकारया पाखें जूगु दु”, वय्कलं धयादिल, “उगु नीतिं निजी ख्यःयात मछिंगु दु, उगु नीतिं निजी ख्यःयात जलविद्युत् क्षेत्रं चिइकाछ्वयेत स्वःगु खनेदु ।”