येँ महानगरपालिकां चौधरी ग्रुपयात निगु लख तका जरिवाना याःगु दु । गुणस्तर म्हो जूगु चाउचाउ लुइवं कृषि तथा पशुपन्छी विभागं जरिवाना याःगु खः । बजार व्यवस्थापन तथा अनुगमन ऐन २०७७ या दफा २९ या खण्ड ‘घ’ कथं कसुर खनेदुगु धासें उगु हे ऐनया दफा ३० या उपदफा (१) या खण्ड ‘ख’ कथं जरिवाना याःगु खः । वैशाख १२ गते क्वःछ्यूगु जरिवाना कम्पनीं ७ न्हु दुने पुलेमाः ।
महानगरपालिकाया वडा नं. ६, सरस्वती नगरया किराना पसलं वैशाख २ गते चाउचाउ जफत याःगु खः । २०८० चैतय् उत्पादन याःगु ६० ग्रामया २० तका मू तयातःगु व्याच नं. AL/YL23 या चाउचाउ जफत याये धुंकाः१५० ग्राम नमूना चाउचाउ परीक्षण यायेत प्रयोगशाला छ्वःगु खः । थुकथं छ्वःगु नमूनाय् कम्पनी व उत्पादनया विवरण गोप्य तयातःगु खः । ७ गते प्रयोगशालाय् ब्यूगु नमूना रिपोर्ट ११ गते पिहाँ वःगु खः ।
प्रयोगशालाया रिपोर्ट वये न्ह्यः स्थलगत अवस्थाया प्रतिवेदन बिसें खाद्य प्राविधिक अनिल बस्नेत व अशोक पराजुलीं, निम्न गुणस्तरया चिकं छ्यलाः चाउचाउ फ्राइ याःगु जुइफुगु, कच्चा पदार्थ निम्न गुणस्तरया जुइफुगु प्रतिवेदन ब्यूगु खः ।
नमूनाया प्रयोगशाला परीक्षणं वःगु प्रतिवेदनं गुणस्तरया विवरण बिसें धाःगु दु, सियुगु चाउचाउस गाढा सियुगु व हाकुगु दाग खनेदुगु खः ।
रिपोर्टकथं चाउचाउस एसिड भ्यालु १३.९३४ mg KOH/g Oil खनेदुगु दु । थुकिया भ्यालु १ mg KOH/g Oil स्वयां अप्वः जुइमज्यू ।
खाद्य प्राविधिक बस्नेतयाकथं थथे जूगु धइगु चिकंया गुणस्तर मदुगु धइगु खः । थुकिया निरन्तर छ्यलां क्यान्सरलिसेंया घातक ल्वय् जुइफुगु खाद्य प्राविधिक बस्नेतं कनादिल ।
चाउचाउ मीगुलिसे एस. के. इन्टरप्राइजेजं महानगरपालिकायात पौ च्वसें धाःगु दु, थुगु व्याच नम्बरपाखें बजारय् वितरण जूगु चाउचाउ लित कायेगु व आवंलि उगु चाउचाउ ममीगु प्रतिवद्धता पत्र छ्वःगु दु । थुज्वःगु गुणस्तर मदुगु खाद्य बस्तुया जिम्मेवारी उत्पादक कम्पनी सी. जी. फुड नेपाल जुइगु नं पतिइ न्ह्यथनातःगु दु ।
