अर्थमन्त्री डा. प्रकाशशरण महतं वइगु आर्थिक दँया निंतिं विस्तारकारी व तःधंगु बजेट हये फइगु अवस्था मदुगु खँ कनादीगु दु ।
आर्थिक विकास तथा प्रशासन अनुसन्धान केन्द्र व राष्ट्रिय आर्थिक सरोकार समाज नेपालं येँय् ग्वसाःग्वःगु ‘आगामी आर्थिक वर्ष २०८०/८१ को बजेट सन्दर्भमा छलफल तथा सुझाव सङ्कलन कार्यक्रम’य् अर्थमन्त्री महतं स्रोतया सीमितताया हुनिं तःधंगु आकारया बजेट हयेगु सम्भव मजुइगु कनादीगु खः ।
अर्थतन्त्र सुधार यायेत सरकार व अर्थमन्त्रीकथं थम्हं फक्व कुतः यानाच्वनागु वय्कःया धापू दु । “अर्थ मन्त्रालयय् वये धुंकाः जिं यक्व समस्यात खना । गुलि पिने च्वनाः स्वयेबलय्र खनेदुगु खः वस्वयां यक्व समस्या दु खनि । तर जिं फुक्क समस्या निवारण याये फु धइगु मखु । सुधारया निंतिं इमान्दार कुतः याये”, अर्थमन्त्री महतं धयादिल ।
थाैंकन्हय् सार्वजनिक त्यासाया साँवा (मा) ब्याजया दायित्व यक्व अप्वःगु अर्थमन्त्री महतया धापू दु । भुखाय् लिपाया पुनर्निर्माणया निंतिं काःगु त्यासाया मा वइगु दँनिसें पुलेमाःगु दायित्व वःगु वय्कलं कनादिल । अथेहे, बजेट विनियोजनय् कुशलता व कार्यान्वयनय् क्रियाशीलताया निंतिं नं सरकारं बः बीगु वय्कःया धापू दु ।
ज्याझ्वलय् राष्ट्रिय योजना आयोगया न्वकू डा मीनबहादुर श्रेष्ठं थीथी लागां वःगु सुझाव वइगु आर्थिक दँया नीति तथा कार्यक्रम व बजेटय् दुथ्याकेगु कुतः यायेगु धयादिल । अथेहे बजेटय् दुथ्याके मफइगु विषयत १६ क्वःगु आवधिक योजनाय् दुथ्याकेगु धयादिल ।
पूर्व मुख्यसचिव लीलामणि पौड्यालं सरकारं सामाजिक सुरक्षाया लागाय् जूगु लगानीं पुँजी निर्माण यायेत व लजगाः ब्वलंके मफुगु खँ कुलादिल । त्यासा काःगु ध्यबा नं अनुत्पादक लागाय् खर्च जुयाच्वंगु वय्कलं कनादिल ।
अप्वःगु चालु खर्च व कयेकुना वंगु राजस्वया हुनिं ब्वलंगु वित्तीय असन्तुलन थाैंकन्हय्या चुनौती जूगु वय्कःया धापू दु । अथेहे वय्कलं आः पूर्वाधार केन्द्रित बजेट मजुसें जनताया आधारभूत आवश्यकता केन्द्रित बजेट दयेके माःगु खँ कनादिल । आयोजना व ज्याझ्वःया प्राथमिकीकरण जुइ मफुगु वय्कलं कनादिल ।
ज्याझ्वलय् प्रा.डा. शिवराज अधिकारीं नेपालय् जुयाच्वंगु लगानीकथं आर्थिक वृद्धिदर खने मदुगु व आर्थिक वृद्धिदरया तुलनाय् लजगाः सिर्जना जुइमफुगु खँ कनादिल ।