नेपाल एयरलायन्सं प्रादेशिक (अन्तर प्रदेश) हवाई कनेक्टिभिटी अप्वयेकेगु आज्जुं शहरी लागाय् ब्वयेके फइगु निगः जहाज थप न्यायेगु तयारी न्ह्याकूगु दु ।
एयरलायन्सं शहरी लागाया एयरपोर्टय् ब्वयेके फइगु निगः जहाज न्यायेगु ज्या न्ह्यज्याकेत निगम व्यवस्थापनया उप समितिं थःगु प्रतिवेदन न्ह्यब्वये धुंकूगु धाःगु दु।
नेपाल वायुसेवा निगमया प्रवक्ता रमेश पौडेलया कथं थुगु ज्याय् विशेष पहल यानाः याकनं थुकथंया जहाज न्यायेगु ज्या क्वचायेकेत निगमया कार्यकारी अध्यक्ष युवराज अधिकारीया नायःसुइ बैशाख २६ गते मंगलवाः च्वंगु मुँज्यां निगम संचालक समितिया दुजः वरिष्ठ क्याप्टेन सुधीर समशेर राईया कजिसुइ गुम्ह दुजः दुगु उपसमिति स्वने धुंकूगु धाःगु दु ।
उगु उपसमितिं २१ ज्या दिं दुने प्रतिवेदन लःल्हायेगु यानाः ज्या न्ह्याके धुंकूगु वय्कलं कनादिल । प्रवक्ता पौडेलया कथं शहरी लागाया एयरपोर्टय् ब्वयेकेगु जहाज मदुगुलिं निगमं थाैंकन्हय् शहरी लिसें व्यापारिक ल्याखं फाइदाजनक लागाय् उडान याये फयाच्वंगु मदु ।
निगमं निगः जहाज न्याये धुंकाः येँ, विराटनगर, भैरहवा, पोखरा, नेपालगञ्ज, धनगढी लिसें नेपाःया शहरी लागां प्रादेशिक उडान न्ह्याकाः अझ अप्वः यात्रुपिन्त सेवा बी फइगु आशा याःगु दु ।
