वि.सं. २०७९ न्हूदँया लसताय् येँया मुख्य व्यापारिक केन्द्र न्यूरोडय् फोर नाइन बागलुङ ज्वेलर्सया औपचारिक उलेज्या याःगु दु । ज्वेलर्सका प्रोपाइटर अमिर सुनारया अबुलिसें चितवन नारायणगढय् च्वंगु बागलुङ ज्वेलर्सया संचालक टिकाराम सुनारं रिवन चानाः पसःया उलेज्या याःगु खः ।
महर्जन कम्प्लेक्सय् चायेकूगु तिसा पसलं छुं ई न्ह्यःनिसें हे गाहाकिपिन्त सेवा बीगु ज्या न्ह्याके धुंकूगु खःसां औपचारिक उलेज्या न्हूदँया लसता लाकाः याःगु खः ।
‘शुद्धता जिमिगु प्रतिवद्धता’ नारा बियाः न्ह्याकूगु पसलं तिसा न्यायेबलय् २४ क्यारेटया शुद्ध लुँ दइगु दावी याःगु दु ।
२९ दँ दुम्ह ज्वेलरी व्यवसायी सुनारं थ्वयां न्ह्यः चितवनय् बागलुङ ज्वेलर्स न्ह्याकूगु खःसा उगु इलय् थम्हं तातुंथें व्यवसाय मन्ह्यायेवं कतारय् वनाः १६ ला सुरक्षा गार्डया ज्या यानाः नेपाः लिहाँ वःगु खः । नेपाः लिहाँ वये धुंकाः बागलुङ ज्वेलर्सयात न्हूकथं न्ह्याकाः चितवनय् हे फोर नाइन बागलुङ ज्वेलर्सया हे नामं तिसा पसः न्ह्याकूगु खः । येँय् व्यवसाय विस्तार यासें सुनारं न्यूरोडयो महर्जन कम्प्लेक्सय् फोर नाइन बागलुङ ज्वेलर्स न्ह्याकूगु खः ।
वय्कलं धयादी ‘विदेशी भूमिइ जीवनयात थुइका, म्वायेगु सयेका । विदेसय् सयेका आः देय्यात बीगु खः । नेपालय् हे अवसरया श्रृजना यायेगु व देश विकासय् छुं योगदान बीगु निंतिं ज्या याये ।’
पसः उलेज्या जूगु लसताय् ज्यालाय् ५० प्रतिशत छुटया सुविधा बियातःगु दु । थ्व छुट सुविधा वइगु वैसाख १५ गतेतक काये फइगु प्रोप्राइटर अमीर सुनारं कनादीगु दु ।
