त्याय् कयाः पुले मखु धाये मज्यू, गुलिं मनूतय्सं गलत अभियान न्ह्याकाच्वन ः मन्त्री चौधरी

महिला, बालबालिका तथा ज्येष्ठ नागरिक मन्त्री भगबती चौधरीं बैङ्क व वित्तीय संस्थातय्के त्यासा कयाः पुले मखु धाये मिले मजूगु धयादीगु दु । फरवार्ड माइक्रो फाइनान्स लघुवित्त वित्तीय संस्था लिमिटेडया ११ क्वःगु वार्षिक उत्सवयात सम्बोधन यासें मन्त्री चौधरीं थथे धयादीगु खः ।
गुलिखे मनूतय्सं त्यासा मिनाहाया खँ ल्ह्वनाः त्यासामिपिन्त ल्ह्वनेगु ज्या यानाच्वंगु धयादिसें वय्कलं तर व जुइ मफइगु खँ जूगु कनादिल । दुर्गा प्रसाईँ, मणिराम ज्ञवाली थुज्वःपिं मनूतय्सं गलत अभियान न्ह्याकाच्वंगु धयादिसें मन्त्री चौधरीं थुकिं त्यासामिपिन्त झन् समस्याय् लाकीगु धयादिल ।
थुज्वःगु गतिविधिं देय्या अर्थतन्त्रयात स्यंकीगु धयादिसें वय्कलं पाय्छिकथं गुकथं समस्या समाधान याय्गु धइगु खँयात कयाः न्ह्यज्याये माः धयादिल । ‘सही तरिकां सही माग ज्वनाः न्ह्यज्याःसा बांलाइ । तर अर्थतन्त्र हे स्यंकेत स्वल धाःसा भविष्यय् व थः हे स्यनावनी । उकिं झीसं मेपिनिगु बहकाउलय् लगे जुयाः थःगु तुतिइ थम्हं हे पां पाले मज्यू’, मन्त्री चौधरीं धयादिल, ‘झी सुझबुझपूर्ण तरिकां न्ह्यायेमाः । बरु छिकपिसं जिमित छिगु सुख दुखबारे धयादिसँ । थःगु सुखदुख नं धायेमाः । वित्तीय संस्था बांलाइगु धइगु दुजःपिनि हे हुनिं जूगु खः । दुजःपिसं थन ब्वति कयाः, छिकपिसं त्यासा कयाः हे लघुवित्त ब्वलंगु खः ।’
राष्ट्र बैङ्कं वित्तीय संस्थाया नियमन याइगु धयादिसें वय्कलं राष्ट्र बैङ्कया नियमपिने वनाः छुं नं वित्तीय संस्था वने मज्यू धयादिल । ‘आः लघुवित्त संस्थात दुगुलिं हे गांगामय् तःकेहेँपिसं चिचीधंगु त्यासा कयाः व्यवसाय याये खनाच्वंगु दु । मेमेगु चिचीधंगु खर्च याये खंगु दु’, मन्त्री चौधरीं धयादिल ।
देय्न्यंकं ५९ लख मनूत लघुवित्तय् आबद्ध जूगु धासें मन्त्री चौधरीं छुं मनूतय्गु चर्चाया निंतिं ऋण मिनाहाया माग कयाः न्ह्यानाच्वंगु कनादिल ।
संस्थायात नं बचे याये माः धयादिसें मन्त्री चौधरीं अर्थतन्त्रयात समस्याय् लाकीगु कथंया गतिविधि याये मज्यू धयादिल । ‘अर्थतन्त्र हे ध्वस्त जुइकथंया गलत माग तयेगु खँ बांमलाः । व औचित्यहीन जू’, वय्कलं धयादिल, ‘उकिं राष्ट्र बैङ्कं थ्व जुइमखु । थ्व औचित्यहीन खः धाःगु दु ।’
लघुवित्तय् छुं कमीकमजोरी दुगु धासें वय्कलं फुक्क लघुवित्तत बांलाःगु् मखुसां नं संस्थादुने दुगु कमीकमजोरीतय्गु विषयस संस्थाया भेला, बैठकय् छुं सहुलियत बियादिसँ धााः माग यायेगु स्वाभाविक खँ खः धयादिल ।
यक्व संस्थातय्पाखें त्यासा काःगुलिं नं समस्या ब्वलंगु वय्कःया धापु दु । संस्थां त्यासा काःगु ध्यबा उत्पादनमूलक ख्यलय् लगे याये मफयाः बैङ्क, वित्तीय संस्था व सहकारीया ध्यबा उठे मजूगु वय्कलं धयादीगु दु ।