तच्वकं वा वःगुलिं म्हिगः दिकूगु एसीसी प्रिमियर कप च्याम्पियनशीपया थौं ‘रिजर्भ डे’कथं जूगु कासाय् नेपालं यूएईयात ७ विकेटं बुकूगु दु । नेपाःया निंतिं गुलशन झां अर्धशतकीय इनिङ्स म्हिताः नेपाःयात उपाधि त्याकेत तिबः ब्यूगु खः ।
त्रिवि मैदान कीर्तिपुरय् थौं जूगु फाइनलय् संयुक्त अरब इमिरेट्स (युएई)यात बुकुसेंलि नेपाः वइगु सेप्टेम्बरय् पाकिस्तानय् जुइगु एसिया कपया निंतिं ल्यःगु दु । एसिया कपय् भारत व पाकिस्तान थें क्रिकेटया तःधंगु देय्या ब्वति दइ ।
१० गू पुचलं ब्वति काःगु थुगु कासाया न्हापांगु स्वंगूया धलखय् लाःगुलिं नेपाल, युएई व ओमानं एसीसी इमर्जिङ टिम्स एसिया कपया यात्रा नं सुनिश्चित याःगु दु ।
त्याकेत युएईं ब्यूगु ११८ रनया सामान्य तातुनाय् न्ह्यज्याःगु नेपालं ३०.३ ओभरय् स्वंगू विकेट त्वःफिकाः तातुना पूवंकूगु खः । नेपाः त्याकेगु निंतिं गुलशन झां ८४ बलय् स्वंगू चौका व ६ छक्काया ग्वाहालिं अविजित ६७ रन दयेकल । गुलशनया थ्व एकदिवसीय कासा जीवनया निगूगु अर्धशतक खः ।
भिम सार्कीं अविजित ३६ रन दय्कलं । भिमं ७२ बलय् प्यंगू चौकाया ग्वाहालिं थुगु रन दयेकूगु खः ।
थ्वयां न्ह्यः नेपालं ओपनर कुशल भुर्तेलयात १ व आशिफ शेखयात ८ रनय् त्वःफिकेमाःगु खःसा कप्तान रोहित पौडेल नं १ रनय् पेभेलियन लिहाँ वंगु खः ।
बलिङय् युएईया रोहन मुस्तफां निगू व आयन अफ्जल खानं छगू विकेट काःगु खः ।
नेपालं त्याकूगु थौंया म्यान अफ दि म्याच गुलशन झा जुल सा म्यान अफ द सिरिजया उपाधि सन्दिप लामिछानें त्याकेत ताःलाःगु दु । लामिछानें थुगु सिजनय् न्यागू कासा म्हितूगु खःसा १३ विकेट कायेत ताःलाःगु खः ।
युएईविरुद्ध नेपाल–११
रोहित पौडेल (कप्तान), आसिफ शेख, कुशल भुर्तेल, भीम सार्की, कुशल मल्ल, आरिफ शेख, गुलशन झा, सोमपाल कामी, करण केसी, सन्दीप लामिछाने व ललित राजवंशी ।