स्वक्वःतक आइसिसी टी–२० विश्वकप त्याकाः इतिहास दयेकूगु भारतीय मिजं क्रिकेट पुचःयात भारतया क्रिकेट नियन्त्रण बोर्ड (बिसिसिआई)पाखें छगू करोड ४० लख अमेरिकी डलर नगद सिरपाः बीगु घोषणा याःगु दु ।
बिसिसिआईं मङ्गलबाः पितब्यूगु वक्तव्यय् कासामि, प्रशिक्षक, सहयोगी स्टाफ व ल्यज्यामिपिनिगु ‘ऐतिहासिक उपलब्धि’या हनाकथं उगु सिरपाः बीत्यंगु धाःगु दु ।
बोर्डया सचिव देवजित साइकियां थुगु सफलतां भारतयात टी–२० ढाँचाया इतिहासय् दकले सफल पुचः मध्ये छगूकथं स्थापित याःगु धाःगु दु ।
भारतं आइतबाः अहमदाबादय् जूगु फाइनल कासाय् न्युजिल्यान्डयात ९६ रनं बुकाः लगातार निक्वः खुसीइ ट्रफी ल्ह्वनाः धेंधेंबल्लाःया उपाधि थातं तःगु न्हापांगु पुचः जूगु दु । लिसें सह–आयोजक जुयाच्वंम्ह भारत घरेलु मैदानय् हे टी–२० विश्वकप त्याकूगु न्हापांगु देय् नं जूगु दु ।
घोषित नगद सिरपाः कासामि, प्रशिक्षक व सहयोगी कर्मचारीलिसेंया सकल पुचःयात लःल्हाइगु धाःगु दु । थ्व बाहेक अन्तर्राष्ट्रिय क्रिकेट परिषद् (आइसिसी) पाखें नं भारतं त्याकामिकथं २३ लख ४० द्वः डलर काये खनी । उपविजेता न्युजिल्यान्डयात ११ लख ७० द्वः डलर सिरपाः दइ । हलिमय् दकलय् अप्वः जनसङ्ख्या दुगु भारतय् क्रिकेट तसकं लोकंह्वाःगु कासा खः ।
शीर्ष कासामिपिं राष्ट्रिय स्तरय् तःधंपिं स्टारकथं म्हस्यू अले क्रिकेटं थीथी सांस्कृतिक पृष्ठभूमि दुपिं मनूतय्त छगू थासय् हयेत महत्त्वपूर्ण माध्यमकथं ज्या यानावयाच्वंगु दु ।
भारतं उपाधि त्याकेवं देय्न्यंकं उत्सवया माहोल खनेदुगु दु । आइतबाः चान्हय् वँचुगु भारतीय जर्सी फिनातःपिं समर्थकत सडकय् पिहाँ वयाः ड्रम थानाः व बलिउड म्येय् प्याखं हुलाः विजयोत्सव हंगु खः ।