येँ महानगरपालिका १२ वडाया ग्वसालय् थनिंनिसें निन्हुयंकया अन्तर वडा ज्यूताइडाे कासा न्ह्याःगु दु । येँ मनपा १२ वडाया दुजःलिसें कासाया कजि श्यामकृष्ण खड्गीया सभापतित्वय् जूगु ज्याझ्वलय् येँ मनपा १२ वडाया अध्यक्ष बालकृष्ण महर्जन मूपाहाँकथं झायादीगु खः ।
येँ मनपाया १२, १४, १५, १६, १७, १९, २०, २२, २४, २५, २६ व २७ वडाया कासामिपिनि ब्वति दुगु कासा मिजंपाखे न्यागू व मिसापाखे स्वंगू ताैल समूह दयेकाः कासा न्ह्याःगु खः ।
येँ मनपा २४ वडाया नायः विनाेद कुमार राजभण्डारीया विशेष उपस्थिति दुगु ज्याझ्वलय् येँ मनपा १२ वडाया सचिव सञ्जुमा महर्जनं लसकुस यानादीगु खःसा वडा दुजः पुष्परत्न प्रजापति, नेपाल फूल कन्ट्याक्ट कराँते महासंघया नायः सूर्यबहादुर बुढाथाेकीपिसं नुगःखँ तयादीगु खः ।
वय्कःपिसं कासायात खेल भावनाकथं म्हितेत इनाप यासें कासाय् त्याःबू जुयाच्वनीगु तर बुत धकाः हरेश नयेगु मखुसें थम्हं म्हितागु कासापाखें सयेकाः लिपा अझ बांलाक कासा न्ह्यब्वयेत इनाप यानादिल । थुकथं हे वय्कःपिसं कासामिपिन्त अनुशासित ढंगं कासाया मर्यादाय् च्वनाः कासा म्हितेत नं इनाप यानादिल ।
येँ मनपा १२ वडां खाेल्चापाखा स्पाेर्टस् क्लब व नेपाल राष्ट्रिय ज्यूताइडाे (फूल कन्ट्याक्ट) संघलिसे सहकार्यय् कासा ग्वसाःग्वःगु खः ।
कासा कन्हय्तक न्ह्याइगु ग्वसाःखलकं धाःगु दु ।
