सर्वसाधारणया सुरक्षा, सहरी सुन्दरता, सडक पेटी वा सार्वजनिक प्रयोगया संरचना, विद्युत व टेलिफोनया थां, सवारी वयेवनेगुली लिच्वः लाकी कथं येँ मनपादुने गुगुं नं थासय् थासय् वाह्य बिज्ञापन याये मदइगु जूगु दु । २०७९ चैत ३० गते पिदंगु येँ मनपाया स्थानीय राजपत्रय् दुथ्याःगु ‘येँ मनपा वाह्य विज्ञापन नियमन निर्देशिका — २०७९’ स थुज्वःगु व्यवस्था दु ।
६ परिच्छेद व २४ दफा दुगु निर्देशिकाय् वाह्य विज्ञापन सम्बन्धी व्यवस्था, बिज्ञापन यायेत निषेध, बिज्ञापन याये मज्यूगु, ग्राह्य मजुइगु विषय, निषेधित लागा घोषणा याये फइगु, बिज्ञापन बोर्ड, परिचय पाटी, नियमन समिति स्वनेगु लिसेंया व्यवस्था दु । नियमन समितिया ज्या, कर्तव्य व अधिकार, बिज्ञापन कर सम्बन्धी व्यवस्था, स्थानान्तरण सम्बन्धी व्यवस्था, बिज्ञापन कल्याण कोष न्ह्याकेगु, वाह्य विज्ञापनया निंतिं अनुमति बी मफइगु, बिज्ञापन खारेज, वातावरणमैत्री विज्ञापनया प्रवर्धन, प्रोत्साहन लिसेंया प्रबन्ध दु ।
प्रचलित कानुन व निर्देशिकाया प्रतिकुल जुइगु बिज्ञापन ज्वलंयात न्यायिक समितिं १ लख तकातक जरिवाना याये फइगु व्यवस्था निर्देशिकां याःगु दु । महानगर लागा दुने बिज्ञापन याय्गु प्रयोजनया निंतिं छुं नं थासय् लुखा व स्टल दयेकेगु, स्टिकर तिकेगु, वाल पेन्टिङ्, पोष्टरिङ्, पम्प्लेटिङ्, पर्चा वितरण, व्यानर तिकेगु माध्यमयात अनुमति बीमखु ।
थ्वकथं बिज्ञापन सम्बन्धी संघीय व प्रदेश कानुन अःखः जुइगु, धार्मिक, सांस्कृतिक, पुरातात्विक, ऐतिहासिक स्थल, विश्व सम्पदा लागाय् सूचीकृत मौलिक संरचना वा संस्कृतिइ लिच्वः लाकीगु बिज्ञापन याये दइमखु । महानगरपालिकाया नगर सभां स्वीकृत नीतिं गुगुं नं थाय् विशेषय् पनातःगु दुसा उज्वःगु विज्ञापन याये दइमखु । बिज्ञापन तयेगु थाय् १२ फिट स्वयां म्हो जाः दुसा, नक्सापास मजूगु संरचनाय्, प्राविधिक रुपय् बःमलाःगु छेँय्, पिनें रंग पाना मतःगु छेँय्, स्वयेबलय् स्यल्लाःगु खनेमदुगु छेँय् बिज्ञापन बोर्ड तये दइमखु । गुगुं छेँ वा छेँया बार्दली, झ्याः, लुखा, भेन्टिलेटर किनाः फय् वा जः पनाः वोर्ड तये दइमखु ।
मल, सुपर मार्केट व बहुतले व्यावसायिक भवन बाहेकया पुरातात्विक महत्वया लागा, प्रशासनिक लागा, सम्पदा लागा, कुटनीतिक लागाय् व उकिया १ सय मिटर दुने बोर्ड तये दइमखु ।
विज्ञापनय् ग्राह्य मजुइगु विषयत
नेपाःया सार्वभौमसत्ता, राष्ट्रिय अखण्डता, राष्ट्रिय स्वाधीनता, संघीय एकाइ दथुइया स्वापू, सार्वजनिक शान्ति सुव्यवस्था, अन्तरराष्ट्रिय स्वापु स्यंकीगु विषय वा ज्वलंयात ग्राह्य मजुइगु विषयकथं कयातःगु दु । देय्या ध्वाँय्, देय्या म्ये, निशाना छाप, छापया आंशिक वा पूवंगु ब्व, राष्ट्रिय विभूतिया छ्यला वा अवमूल्यन जुइगु कथंया विषय, राज्यद्रोह, अदालतया अपहेलना, अपराध दुरुत्साहन याइकथं बिज्ञापन याये दइमखु ।
लैङ्गिक विभेद, जातीय छुवाछुत, धर्म, वर्ण, लिङ्ग, जातजातिया दथुइया स्वापू, आर्थिक अवस्था, भाषा, लागा, वैचारिक आस्था वा अपाङ्गतालिसेंया गुगुं नं लिधंसाय् विभेद जुइगु विषय विज्ञापन सामग्रीकथं ग्राह्य जुइमखु ।
गाली वेइज्जती जुइगु, अपमान जुइगु, शिष्टाचार वा नैतिकताय् लिच्वः लाइगु, ज्याप्रति अपहेलना जुइगु विषय, टे«ड मार्क, पेटेन्ट, डिजाइन लिसेंया औद्योगिक सम्पत्ति छ्यलेबलय् हकवालाया अनुमति स्वीकृति मकासे छ्यले दइमखु । मेपिनिगु ज्वलं वा उत्पादनयात कमसल क्यनीगु, छगूलिसे मेगु तुलना यानाः सुयातं बांमलाःगु क्यनेगु विषय बिज्ञापनया नितिं अस्वीकार्य जुइ ।
गुगुं नं उत्पादनयात हतोत्साह वा निरुत्साह याइकथं, अफवाह वा उत्तेजना न्यंकीगु लिसें मेगु गुगुं नं कथंया अमर्यादित व्यवहार सम्बन्धी विषय बिज्ञापन विषयकथं ग्राह्य जुइमखु । कानुनं गोग्य तःगु विषयस जानकारी बीगु, अय्लाः, चुरोट, सूर्ती लिसें सूर्तीजन्य लिसें मनूया उसाँय्यात लिच्वः लाकीगु विज्ञापन सामग्री ग्राह्य मजुइगु विषयकथं तयातःगु दु ।
भाषिक शुद्धता, सामाजिक मूल्य मान्यता लिसें मर्यादा, शालीनताय्, शान्ति सुरक्षाय् ग्वाहालि याइगु विषययात प्राथमिकता बीमाःगु निर्देशिकाय् व्यवस्था यानातःगु दु ।
बिज्ञापन याये मज्यूगु विषयत
प्रचलित नेपाल कानुनं उत्पादन, बिक्री वितरण, उपभोग व प्रयोग यायेत निषेध यानातःगु वस्तु, पदार्थ लिसें सेवा, महानगरया स्थानीय कानुन विपरीतया सेवा, संरचना व विषयबस्तुया विज्ञापन याये दइमखु । कानुनं अश्लील तायेकातःगु विषय, सामाजिक रुपय् भ्रम व विकृति न्यंकीगु, अन्धविश्वासयात तिबः बीगु, चिकित्सकया सिफारिसय् जक मीमाःगु वासःया विज्ञापन याये दइमखु ।
अनुमति कयाः जक छ्यले दइगु सेवा सम्बन्धी विज्ञापन सेवा न्ह्याके न्ह्यः याये दइमखु । स्वच्छ प्रतिस्पर्धाय् लिकुंकीगु, दृश्य प्रदुषण अप्वयेकीगु, सवारी दुर्घटना अप्वयेकीगुकथंया बिज्ञापन याये दइमखु ।