भैरवया बुदिं ः भैरवाष्टमी

द्यःपिनि नं बुदिं हनेमाःगु चलन जुया वयाच्वंगु खनेदु । गथे कि श्रीकृष्णया कृष्ण जन्माष्टमी धकाः तःजिक मानय् यानावयाच्वंगु झीसं स्यूगु हे जुल । अथे हे झी बुद्ध जयन्ति धकाः बुद्धया जन्म दिं हनावया च्वनागु हे जुल । थथे तुं झी आजुद्यः (भैरब) या बुदिं पात्रोय् जक छाय् लिकुंका तय्गु धकाः वंघःत्वाःया भजन खलः व वंघः त्वाःया भक्तजनपिं मिलय् जुयाः २०२२÷२०२३ सालपाखेनिसें निरन्तररुपं श्री आकाश भैरवनाथ (आजुद्यः)या नं भैरव उत्पत्ति दिं धकाः धया तःकथं भैरवाष्टमी खुनु विशेष पुजा न्ह्याके ज्या जूवंगु खनेदु । थुकथं थुगु दिनय् श्री आकाश भैरव द्यःछेँ न्ह्यःने समय्द्वँ तयाः अले द्यःयाथाय् विशेष पुजा देछाय्गु ज्या जुयाच्वंगु दु । अथेतुं वंघः त्वाः खलःपिंसं नं झी नेवाः परम्पराकथं पूजाआजा यानाः ख्य्ँय् सगं बिइगु चलन न्ह्याके ज्या जुयावःगु दु । श्री आकाश भैरबनाथ (आजु द्यः) यात भैरवाष्टमी खुनु ख्य्ँय् संग विइ । थ्व भैरवाष्टमी नं वंघः आजु द्यःयात न्हापा न्हापा थथे मानय् यानावःगु खनेमदु । अले थ्व मेमेपिं भैरवनाथ (आजु द्यः)या बुदिं भैरवाष्टमी धकाः मानय् याःगु खनेमदु । गुगु थाय्यापिं भैरब द्यःयात नं भैरवाष्टमी खुनु बुदिं धकाः मानय् याय्गु सहलह जूगु खः तर आःतक याःगु धाःसा खनेमदु ।
खय्त ला श्री आकाश भैरवनाथ द्यःयाथासं भैरवाष्टमी मानय् याना वयाच्वंगु धैगु हे सकल (भैरवनाथ) आजुद्यःया स्वरुप सकल हे छथासं लाका नालाः भैरव उत्पती नाला तःकथं भैरवाष्टमी बुदिं धकाः मानय् याःगु हे फुकं भैरबनाथ (आजु द्यः) यागु धकाः झीसं सिइके माः । द्यः धैपिं सकल द्यः छम्ह हे खः धकाः थुइके–सिइके झीगु दर्शनया मर्म नं थ्व हे खः ।
द्यःयात झीसं थःगु मनं खनाः सिइकाः÷सय्काः हे, दुनुगलंनिसें भक्तिभाव याय्बलय् न्ह्यागु ज्या नं तिप्यनीगु धारणा दु, नुगः दोधार यानाः मनं खँ ल्हाकाः संका यानाः ज्या यात धाःसा थुगु मति यानाः ज्या गुबलें तप्यनी मखु धकाः झीसं सिइके माःगु दु । द्यःयात मानय् याय्गु थःगु हे नुगःया खँ खः । याःसा याय्मते धकाः सुनां नं धाइ मखु । मयाःसां सुनां नं या धकाः धाइ मखु थःम्हेसिया मनंतुनाकथं खःगु लँपु ज्वनाः वने फय्केमाः धैगु झी पूर्खाया धापु दु । झीसं सिइके माःगु छु दु धाःसा बिया बिज्याइम्ह नं वसपोल हे काइम्ह नं वसपोल हे खः । वसपोलं छु याय् माःगु खः वय्कलं हे याइ झी ला माध्यम जक ख । अथेंतु भैरबनाथ (आजु द्यः) धइम्ह नं छम्ह द्यः खः मानय् याय्गु मयाय्गु थम्हं मनं खनाः जक याय्गु ।