नेपालभाषाया संगीत व सन्चारख्यलय् छम्ह क्यामेरामाएन व एडिटरया रुपय् नांजाम्ह बि के जल्मी या निर्देशनय् न्हूगु छपू म्ये गजागु कासा द म्हिताबिल छं बोलया म्येया म्युजिक भिडियो या पितब्वज्या छगू ज्याझ्वःया दथुइ जुउगु दु । यल हरिसिद्वि जलया थान्सि कटेजय् जुउगु उगु ज्याझ्वलय् संगीतकःमि जिवित जल्मीं हालादीगु खस नेपालीभाषाया म्ये बिहानी को शितल हावाको स्पर्श म्येया अडियो नं पितब्वज्या जुउगु खः ।
नांजाम्ह संगीतज्ञ जुजुकाजि रन्जित मूपाहाँ कथं झायादीगु उगु निपु म्येया पितब्वज्या ज्याझ्वः लुनिभा प्रोडक्शन या कजि नापं म्येया सर्जक बि के जल्मीया सभानायसुइ जूगु खः । ज्याझ्वलय् नेपालभाषाया न्हापांम्ह म्युजिक भिडयो निर्दशक विजयरत्न असंबरे व यल वडा १६ या नायः गीतकार निर्मलरत्न शाक्य विशेष पाहाँ कथं झायादीगु खः । मूपाहाँ संगीतज्ञ रन्जितं कला क्षेत्रय् न्हूगु पहया विकास जुया वया च्वंगुयात नाला कायेमा धका धयादिल ।
अथेहेतुं विशेष पाहाँ असंबरें संगीतख्यःयात अार्थिक समृद्धि या आधार दयेकेमाःगु खँय् बः बिया दिल । पितब्वज्या जुउगु म्येया मोडल व फेशन डिजायनर शोभा महर्जनं लसकुस न्वचु तयादीगु उगु ज्याझ्वलय् संगीतकःमि जिवित जल्मी नं नं नुगःखँ तयादिल । पितब्वज्या जुउगु म्ये गजागु कासा द म्हिताबिल छं म्येहालामि राकेश महर्जन खुसु भाजुं हालादीगु खः । म्येहालामि खुसु भाजु थःम्हेसिनं हे लसय् हनादीगु थ्व म्येया बाजं ग्वसाः जिवित जल्मी, थ्व म्युजिक भिडियोया क्यामेरामाएन रबिन डंगोल खः ।थुक शोभा महर्जन व अनुज शाक्यया नापनापें रेखा खड्बा व र्जिना खड्बा पिन्सं नं अभिनय यानादीगु दु ।
अले निर्देशन व सम्पादन या नापनापं म्येच्वमि बाबुकाजी बि के जल्मी खः । उगु हे ज्याझ्वलय् पितब्वज्या जुउगु जिवित जल्मीं हालादीगु बिहानी को शितल हावाको स्पर्श म्येया च्वमि बाबुकाजी बि के जल्मी व म्येहालामि व लय् चिनामि जिवित जल्मी खः ।