म्येच्वमि शैलेश शाक्य लगंबरें च्वःगु व रिता महर्जनं लसय् हनाः सः ब्यूगु म्ये यःबाः यःबाः थौं विमोचन जूगु दु ।
नेपाल संवत् ११४२ राष्ट्रिय न्हूदँ समारोह समितिया नायः निरञ्जन रत्न शाक्यया नायःसुइ न्ह्याःगु मुँज्याय् नेपालभाषा एकेडेमीया उपकुलपति मल्ल के सुन्दर मूपाहाँकथं झायादीगु खः ।
नुगःखँ तयेगु झ्वलय् मूपाहाँ मल्लं संघरत्न शाक्ययाके ५५ दँ न्ह्यः २०२३ सालय् त्रिविया परीक्षा शाखाय् नापं ज्या यानाम्ह पासा प्रेमरत्न शाक्यया किपालु लुइकागु कनादिल । वय्कलं थुगु म्यूजिक भिडियो छगू सर्ट मूभिकथं हे काये फइगु खँ न्ह्यथनादिसें छगू स्तरीय म्ये संकिपा दयेकूगुलिं पुचःयात भिंतुना देछानादिल ।
चारुमति विहारया प्रमुख भिक्षु तपस्सी धम्मपाखें मंगल कामना यासें न्ह्याःगु खः । वय्कलं ज्ञानमाला भजनपाखें बुद्ध धर्मया प्रवर्द्धन जूगु प्रसंग न्ह्यथनादिसें म्ये च्वमि शैलेश शाक्यया च्वसा नं निरन्तर न्ह्यज्यायेमा धइगु मनंतुना ।
ज्याझ्वलय् लसकुस यासें म्ये च्वमि शाक्यं नेवाः नुगः दुम्ह मनू हे येँ महानगरया मेयर जुइमा धइगु कामना यानादिल ।
बाःमदुगु दुःखया इलय् ११ दँ न्ह्यः च्वयागु म्ये मेयर विद्या सुन्दर शाक्यया ग्वाहालि व गोपालकृष्ण महर्जनया निर्माणय् जूगु कनादिल । वय्कलं थःत न्ह्यज्यायेत न्ह्याबलें महर्जनं ग्वाहालि यानाच्वंगु कनादिल । थम्हं च्वयागु म्ये अमरराज शर्मा, संघरत्न शाक्यपिन्त क्यनाः जक फाइनल यायेगु नं वय्कलं कनादिल ।
मुपाहाँ मल्लके सुन्दरं म्येया म्यूजिक भिडियो न्ह्याकेत इनाप यासें विमोचन जूगु खः ।
म्यूजिक भिडियोया कलाकार व ज्यासनामिपिन्त मूपाहाँपाखें खादा न्ययेका ज्याझ्वलय् हंगु खः ।
म्यूजिक भिडियोया सम्पादक व निर्देशक रवि सायमीं थुगु म्ये सामाजिक क्रान्ति हयेगु ज्या जूगु व थुकिया निंतिं न्यनेकने याना बलय् गुरुजुपिसं जी मखु धाःसां यक्व अध्ययन यानाः दयेकागु खँ कनादिल । वय्कलं नेवाः संकिपा व साहित्ययात मतिना यानाः ग्वाहालि यानादीत इनाप यानादिल ।
म्यूजिक भिडियो पितब्वज्या न्ह्यः शैलेश शाक्य लगंबरें च्वयातःगु थीथी म्ये संकिपा व म्ये ज्याझ्वलय् न्ह्यब्वःगु खः ।
