ललित कला विधाय् नांजाम्ह पौभा च्वमि साहित्यकार प्रेममान चित्रकारं च्वयादीगु ” जित स्वया मिखा भाय् याना ” म्येया म्युजिक भिडयोया पितब्वज्या विहिबार छगू ज्याझ्वःया दथुइ जुल ।
स्वर्गिय स्रष्टा प्रेममान चित्रकारं थौंसिबें झिंन्यादँ न्ह्यः च्वया रेकर्ड यानादीगु थ्व म्ये थौंकन्हेया नांजाम्ह संगीतकःमि जिवित जल्मीं लसय् हनादीगु खःसा वयकलं हे एरेन्ज नं यानादीगु खःसा जुजुकाजि रन्जित व संगीता शाक्यं हालादीगु खः ।
म्येच्वमि कथं नांजाम्ह यल वडा ल्याः १६ या वडा अध्यक्ष निर्मलरत्न शाक्य मूपाहाँसुइ न्ह्याःगु पितब्वज्या ज्याझ्वः गिफ्ट नेपालया ग्वसालय् जुउगु खः । ग्वसाखलःया कजि कलाकार व मोडल शोभा महर्जनया सभानायसुइ जुउगु उगु ज्याझ्वः भिक्षु तपस्वीधम्म महास्थविर भन्ते पाखें पवित्रं परित्राण पाठ याना शुरु याःगु खः ।
ज्याझ्वलय् उगु म्युजिक भिडयोया निर्देशक रामकृष्ण खडगीं लसकुस न्वचु तयेगु झ्वलय् म्युजिक भिडयो निर्माणयात कया छुं छुं खँ कुलादिल ।
अथेहेतु सिने पत्रकार विजयरत्न असंबरें म्येयात कया समिक्षा याना दिल ।
ज्याझ्वलय् संगीतकार जिवित जल्मी, म्येहालामि जुजुकाजि रन्जित , स्वर्गिय प्रेममान चित्रकारया जहान विद्या चित्रकार, पाहाँ सुरेन्द्र तुलाधर व मूपाहाँ निर्मलरत्न शाक्यपिन्सं स्व.चित्रकार व चित्रकारं च्वयादीगु ” जित स्वया मिखा भाय् याना ” म्येया बारे थःथःगु नुगःखँ तयादीगु खः ।
