अमेरिकी शहर क्यालिफोर्नियाया सान फ्रान्सिस्कोय् योमरी मय्जुं सांस्कृतिक ज्याझ्वः न्ह्यब्वःगु दु । यति रेस्टोरेन्टय् जूगु ज्याझ्वलय् नेपाःया म्हसीका नसा ज्वलं योमरीया इतिहास, योमरी दयेकेगु तरिका, योमरीया सांस्कृतिक व सामाजिक महत्वलिसें नेपाःया नसात्वँसाय् पंचतत्वया महत्वबारे योमरी मय्जुया नायः अनुपा श्रेष्ठं कनादिल ।
थःपिनि कला व संस्कृति ल्यंकेगु आज्जुं अमेरिकाया थीथी शहरय् योमरी मय्जुया सांस्कृतिक ज्याझ्वःत न्ह्याका वयाच्वनागु कनादिसें नेपाःया थःगु हे संस्कृति, तिसा वसः, नसा, मूल्य मान्यता दुगु व थुकियात ल्यंकेगु व प्रचार यायेत थुकथंया ज्याझ्वः न्ह्याकेमाःगु यति रेस्टोरेंटया संचालक नारायण सोम्नामें कनादिल ।
बिनिशा श्रेष्ठं संंस्कृति ल्यंके झी सकस्यां चाहे जुया तर अप्वः थें झीसं पश्चिमी देखासिकी लय्ताना धयादिसें संस्कृति नं ल्यनेमा, छुं रचनात्मक ज्या नं जुइमा अले लजगाःया ह्वःताः नं चूलायेमा धकाः थ्व प्याकेज ज्याझ्वः न्ह्याकागु कनादिल ।
सांस्कृतिक, धार्मिक, सांस्कृितक मान्यताया लिसें लकसकथंया पौष्टिक आहारकथं महत्वपूर्ण कथं कयातःगु योमरी नेवाः समुदायया सभ्यता व संस्कृतिया नसा ज्वलं खः ।
यःमरीयात नेवाः समुदायया नसा ज्वलंया रुपय् न्ह्यथनातःसां थुकिया महत्वयात ब्यापकता बीगु आज्जुं थ्व ज्याझ्वः अभियानया हे रुपय् न्ह्यज्याकागु धयादिल ।
थीथी संस्कार व उत्सवय् यःमरीया माः क्वखायेगु व स्वांवा गायेकेगुया पलेसा यःमरि वा गायेकेगु नं याः । थ्व हे महत्व न्ह्यब्वसें प्रवद्र्धन यायेत देश विदेशय् यःमरी मय्जुया ज्याझ्वः न्ह्याकावयाच्वंगु दु ।
नेपाःमिपिनिलिसें अमेरिकीपिनि ब्वति दुगु सान्टा रोसाया उगु ज्याझ्वलय् मौलिक नेपाःमि संगीत न्ह्यब्वयेगु लिसे मू आकर्षणया रुपमा नेपाःमि पहःया बुदिं हना न्ह्याकेगु प्रक्रिया न्ह्यब्वया व नेवाः भ्वय्या ग्वसाः नं यति रेस्टोरेन्टं याःगु खः ।
