म्ये च्वमि राजु मानन्धरया रचना व म्येहालामि सज्जु मानन्धरया सलं छायपियातःगु अडियो व भिडयो म्येचा छन्त नापलाये सातकि या पितब्वज्या जनकवि दुर्गालाल श्रेष्ठं शुक्रबार छगू ज्याझ्वलय् यानादिल ।
जनकवि श्रेष्ठं त्वाःदेवाय् मत च्याका ज्याझ्वःया उलेज्या यानादीगु उगु ज्याझ्वः गणेश कुमारी मानन्धर फाउण्डेशनया ग्वसालय् जूगु खः ।
मुकं खुपु म्ये व म्येया भिडियो दुथ्यागु थ्व म्येचालय् म्येहालामि सज्जु मानन्धरयात निशा देशार व रत्नशोभा महर्जनं ज्वम्येय् साथ बिया तःगु दु ।
नांजाम्ह संगीतकःमि जुगल डंगोलं लसय् हनादीगु व बाजं ग्वसाः ग्वयादीगु म्येया भिडियोत धाःसा सुरेन्द्र मानन्धर, राजेन्द्र डंगोल , सुरोज महर्जन लगायतया अलग अलग निर्देशक पिन्सं निर्देशन यानातःगु दु । पितब्वज्या ज्याझ्वः ग्वसाः खलःया नायः दिलबहादुर मानन्धरया सभानायःसुइ जूगु खः ।
जनकवि श्रेष्ठ मूपाहाँ कथं झायादीगु उगु ज्याझ्वलय् सांसद जीवन राम श्रेष्ठ , नेवाः देय् दबूया नायः पवित्र बज्राचार्य, नांजाम्ह म्येहालामि जुजुकाजि रन्जित , सिने पत्रकारिताख्यःया न्ह्यलुवा विजयरत्न असंबरे पिन्सं बिशेष पाहाँ कथं नुगःखँ तयादीगु खः ।
ज्याझ्वलय् म्येहालामि सज्जु मानन्धरं लसकुस यानादीगु खःसा म्ये च्वमि राजु मानन्धरं नं नुगःखँ तयादीगु खः ।
