लुभुइ शनिवार “गालय् वन” संकिपाया क्यनेज्या जुल । उगु संकिपा क्यनेज्याय् नेपाःया नांजाम्ह स्टार धिरेन शाक्य मूपाहाँ कथं विशेष उपस्थितिइ दुउगु खः । थ्व फिल्मया लुभुइ क्यनेज्या लिसे स्वापु दुम्ह कलाकःमि केबिएस लुभुया सभानायसुइ जुउगु ज्याझ्वः मूपाहाँ शाक्यं सुकुन्दाय् मत च्याका उलेज्या यानादिल ।उगु ज्याझ्वलय् वरिष्ठ कलाकार नरेन्द्र थापा , पुलांम्ह फिल्म निर्माता देवेन्द्र मान जोशी , गालय् वन संकिपाया निर्देशक संयुक्त स्थापित , च्वमि पुरुषोत्तम पक्का चकलेट , हिरो किरन जोशी , हिरोइन शोभा श्रेष्ठ पिनिगु नं विशेष उपस्थिति दुउगु खः ।
कलाकार धिरेन शाक्यं गालय् वन” संकिपाया हिरोइन शोभा महर्जन लिसे कलाकार धिरेन शाक्यं ” थौं हाकनं छंगु लुमन्तिइ ” म्येय् म्हितादीगु खः । आः थः कोस्टार शोभा महर्जनया “गालय् वन” लुभुइ क्यंबले कलाकार शाक्य विशेष रुपं जुउगु खँ अन छगू लसता सन्चार जुउगु खनेदत । लुभुया वरिष्ठ व्यक्तित्व रामप्रसाद श्रेष्ठं लसकुस यानादीगु उगु ज्याझ्वलय् संकिपाख्यःया न्ह्यलुवा पवन जोशी व लोकंह्वाम्ह कलाकार यमन श्रेष्ठं नुगःखँ तयादिल । “गालय् वन” संकिपाया लुभुइ क्यनेज्या ताःलाकेत ग्वाहालि याःपिन्त मूपाहाँ शाक्य पाखें हनापौ लःल्हागु उगु ज्याझ्वलय् मूपाहाँ शाक्यं नेवाः संकिपाया विकासया ल्ह्वनेमाःगु पलाः ल्ह्वनेगु बचं नं बियादिल ।
गालय् वन निर्माता अजय दुलाल खः । मेक अप आशा तामाङ, संगीत पुर्णमान महर्जन, संगीत संयोजन जीवित महर्जन जल्मी , रेकर्डिङ र मिक्सिङ सुरेन्द्र श्रेष्ठ, गायक/गायिका पुर्णमान महर्जन व रत्न शोभा महर्जन, कला निर्देशन रेणु सुवाल, पार्श्व संगीत व डबिङ अन्जन श्रेष्ठ, ब्यवस्थापन सिताराम माक (मनका राजा) व सुरेन्द्र श्रेष्ठ, नृत्य निर्देशन रविता बाके, द्वन्द निर्दशन व सहायक निर्देशन लक्ष्मी प्रसाद भैल (ॐ बाबा) अले छायांकन व सम्पादक बाल कुमार मगरं यानादीगु खः । फिल्मया मू कलाकारय् शोभा महर्जन, किरण जोशी, कमल प्रसाद भट्ट, मन्जु श्रेष्ठ, पुरुषोत्तम पक्का (चकलेट), अन्नपुर्णेस्वरी श्रेष्ठ, राजेश गोसाईं, मनी मैंया प्रजापति, शुप्रभा गैजु, श्रृजना प्रजापति, विक्रम प्रजापति, रजत श्रेष्ठ, अजय दुलाल, महेश प्रकाश हाडा, पुर्ण कुमार अवाले, सिताराम माक(मनका राजा), विश्व नारायण भैल, रोशनी श्रेष्ठ, कमला बैजु, जीवन ट्वाति, जुन सितिखु लगायतं अभिनय यानादीगु थ्व फिल्मयात नेवाः फिल्म ख्यलय् छगू बिस्कं पहया फिल्म धका धायेगु यानातःगु दु ।