नेपाःया पीस्वम्हम्ह प्रधानमन्त्रीइ बालेन्द्र शाह (बालेन) नियुक्त जुयादीगु दु ।
राष्ट्रपति रामचन्द्र पौडेलं राष्ट्रिय स्वतन्त्र पार्टी (रास्वपा) या संसदीय दलया नेता शाहयात प्रधानमन्त्रीइ नियुक्त यानादीगु खः ।
नेपाःया संविधानया धारा ७६ (१) कथं बहुमत हःगु पार्टीया संसदीय दलया नेताया कथं राष्ट्रपति पौडेलं थौं हे छुं ई न्ह्यः शाहयात पद लिसें गोपनीयताया शपथ कायेकादीगु दु ।
नवनियुक्त प्रधानमन्त्री शाह वंगु फागुन २१ गते जूगु प्रतिनिधिसभा सदस्य निर्वाचनय् झापा क्षेत्र नं ५पाखें निर्वाचित जुयादीगु खः ।
वय्कलं उगु निर्वाचनय् नेकपा (एमाले) या नायः केपी शर्मा ओलीयात तःधंगु मतान्तरं बुकादीगु खः ।
नवनियुक्त प्रधानमन्त्री शाह आयुर्वेदिक चिकित्सक डा रामनारायण शाह व धु्रवादेवी शाहया काय् जुयादी ।
वय्कःया जन्म विसं २०४७ वैशाख १४ गते येँया न्यतय् जूगु खः । वय्कःया पुख्र्यौली छेँ महोत्तरीया एकडारा खः । ‘र्याप आर्टिस्ट’या कथं नापं म्हसिका दुम्ह शाहं भारतपाखें एम टेक (संरचनागत इन्जिनियरिङ) व पूर्वाञ्चल विश्वविद्यालयपाखें सिभिल इन्जिनियरिङय् स्नातक यानादीगु दु ।
विसं २०७९या स्थानीय तगिंया निर्वाचनय् शाह येँ महानगरपालिकाया प्रमुखय् निर्वाचित जुयादीगु खः । प्रतिनिधिसभा निर्वाचनय् उम्मेदवारी बिइत वय्कलं वंगु माघ ४ गते महानगर प्रमुख पदपाखें राजीनामा बियादीगु खः ।
शाहं येँया प्रमुख जुयाच्वनादीबले पर्यटन व अर्थतन्त्र प्रवद्र्धनया निंतिं नेवाः संरचनाया संरक्षणय् महत्वपूर्ण योगदान बियादिल ।
सहरी शासन व विकास ज्याझ्वःया नेतृत्व, पूर्वाधार सुधार, सम्पदा संरक्षण व सेवा प्रवाहय् सुधारय् नापं वय्कःया योगदान दु । महानगरपालिकाया अवैध संरचना चिइकेत, फुटपाथ लिसें सहरी व्यवस्थापन यायेत योगदान बियादिल ।
नेपाःया थीथी ख्यलय् विशेष यानाः तःभुखाय् लिपाया पुनःनिर्माण व सहरी व्यवस्थापनय् वय्कलं च्वछायेबहःगु योगदान यानादीगु दु । शाहं २०७२ सालया तःभुखाय् लिपाया पुनःनिर्माणय् सक्रिय ब्वति कयादीगु खः । तां, सतक व भवन डिजाइन लिसें निर्माणय् अनुभव कयादीम्ह शाहं सम्पदा संरक्षण लिसें संरचनागत संरक्षण, पर्यटनपाखें आर्थिक विकास व परम्परागत नेवाः वास्तुकलाय् विशेष बः बियादीगु दु ।
निगू दर्जनबिसें अप्वः र्याप कम्पोज यानादीम्ह शाहया सिर्जना भ्रष्टाचारया विरोध लिसें सुशासनया अपेक्षा, युवा लिसें सामाजिक मुद्दाय् अप्वः केन्द्रित दु । वय्कःया म्येय् बेरोजगारी, असमानता, राजनीतिक विकृतिया नापनापं राज्य प्रणालीयात न्ह्यसः न्यनातःगु दइ ।
संविधानसभाया निगूगु निर्वाचन लिपा हे शाहं ‘म नेपाल हाँसेको हेर्न चाहन्छु’ म्ये सार्वजनिक यानादिया देशप्रतिया थःगु चिन्ता प्वंकादीगु खः । वंगु भदौ २३ व २४ गते जूगु जेनजी आन्दोलनय् समर्थन यानादीम्ह शाहयात आन्दोलनया कार्यादेश पूवंकेगु भाला वःगु दु । न्हूगु पुस्ताया बेचैनी व विद्रोहयात सम्बोधन यासें हिउपाःया इच्छायात वय्कलं पूवंकेमालीगु जूगु दु ।