न्हापांगु चा भैरहवाया शान्ति बौद्ध गुम्बाय् च्वनीगु व मेगु दिं रामग्राम स्तुप थ्यंकःवनीगु ज्याझ्वः दु ।
पदयात्रा टोलीया प्रमुख आचार्य चालान अनङ्कानों बुद्धभूमि लुम्बिनीं यात्रा सुरु याये खंगु थःपिनिगु निंतिं तःधंगु सौभाग्य जूगु धयादिल । वय्कलं थ्व यात्रा मन व आत्मायात शुद्ध यायेगु, धर्मया अभ्यास यायेगु लिसें समाजय् करुणा व दयाया भावना च्वयेकेगु ताःतयाः ग्वसाःग्वःगु जानकारी बियादिल ।
“जिपिं बुद्धया पलाः ल्यूल्यू वनाः धर्म अभ्यास यायेत थन वयागु खः”, वय्कलं धयादिल, “लुम्बिनी थें जाःगु पवित्र थाय्या संरक्षण यानाब्यूपिं फुक्क नेपाःया दाजुकिजा व तताकेहेँपिंत साधुवाद व सुभाय् प्वंकाच्वना ।”
थाइल्याण्डया श्रीसाकेत प्रान्तया ‘उद्यान धाम डोंग याङ’ पाखें वःपिं भिक्षुतय्गु टोलीया नेतृत्व आचार्य चरन अनङ्खानों यानादीगु खः ।
टोलीइ थाइल्याण्डया भिक्षुत लिसें लाओस, मलेसिया व भियतनामया भिक्षुत नं सहभागी जूगु खः ।
भन्ते विचयाया कथं थ्व पदयात्रा मूकथं शान्ति व आत्म अनुशासनया अभ्यासया निंतिं याःगु खः ।
“मनूतय्सं थःगु जीवनय् सहनशीलता व आत्मनियन्त्रण गुलि महत्वपूर्ण जू धइगु अनुभव यायेत थुजाःगु यात्रां ग्वाहालि याइ”, वय्कलं धयादिल ।
पदयात्राय् ब्वति काःपिं पलाःपतिकं सचेतनालिसें न्यासे वनाः करुणा व मैत्रीभावया अभ्यास यायेगु आज्जु लिसें यात्रा यानाच्वंगु खः । ग्वसाःखलःतय्कथं थ्व यात्रा बुद्ध धर्मया अनुयायीतय्सं बुद्धया जीवन व शिक्षायात लुमंंकाः आध्यात्मिक साधना यायेगु ह्वःताः नं खः ।
रामग्राम थ्यनेधुंकाः टोली भारतपाखें न्ह्यानाः कुशीनगर, वैशाली जुयाः बोधगयातक न्यासे वनीगु ज्याझ्वः दूगु धाःगु खः । थ्व कथंया पदयात्रा आचार्य चरन अनङ्खानोया नेतृत्वय् दँय्दसं ग्वसाःग्वयावयाच्वंगु टोलीइ ब्वति कयादीम्ह स्वयंसेवक अकननं जानकारी बियादिल ।