थ्वहे फागुन २१ गते जूगु प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीया मतगणना क्वचाल ।
लिपांगु ई गोरखा १ व इलाम १ या मतगणना क्वचायेनापं समानुपातिकपाखेया नापं फुक्क मतगणना सिधःगु निर्वाचन आयोगया सहायक प्रवक्ता कुलबहादुर जिसीं जानकारी बियादिल ।
मतगणना सिधयेवं फारम सम्बन्धित निर्वाचन अधिकृतया ज्याकुथिपाखें आयोगय् विवरण वयेगु ज्या धाःसा जुयाच्वंगु वय्कलं धयादिल ।
समानुपातिकपाखेया मतगणना क्वचायेनापं समानुपातिकपाखे राजनीतिक दलं काइगु सिट ल्याः निर्धारणया गृहकार्य नापं न्ह्याःगु आयोगं धाःगु दु । छुं दिंया दुने हे थ्व प्रक्रिया पूवनीगु धाःगु दु ।
अथे हे, थौं सुथसिया ११ ताः ई तकया समानुपातिक निर्वाचनपाखे छगू क्वति न्हय्गू लख ३९ द्वः सच्छि व १५ मत गणना जूगु निर्वाचन आयोगं धाःगु दु । गणना जूगु मध्ये राष्ट्रिय स्वतन्त्र पार्टी (रास्वपा) ५१ लख ३९ द्वः निसः व ३५ लिसें न्ह्यने लानाच्वंगु दु । नेपाली काँग्रेसं १७ लख ४९ द्वः न्यासः व ८३, नेकपा (एमालें) १४ लख ४८ द्वः च्यासः व ५४, नेपाली कम्युनिष्ट पार्टीं च्यागू लख न्याद्वः न्हय्सः व ७३, श्रम संस्कृति पार्टीं स्वंगुू लख ७८ द्वः खुसः व ४९ व राष्ट्रिय प्रजातन्त्र पार्टीं स्वंगू लख २९ द्वः प्यसः व ७२ मत हःगु दु । मेमेगु दलं धाःसा थ्रेसहाल्ड कटे याइगु स्थिति खनेमदु ।