सर्वोच्च अदालतया वरिष्ठतम् न्यायाधीश सपना प्रधान मल्लं छुं नं ग्याःचिकु व धम्कीं न्याय सम्पादन जुइमफइगु धयादीगु दु ।
सर्वोच्च अदालतं थौं अन्तरराष्ट्रिय मिसा दिवस लिसें न्यायाधीश मिसा दिवसया झ्वलय् ग्वसाःग्वःगु ज्याझ्वलय् वरिष्ठतम् न्यायाधीश मल्लं न्याय सम्पादन ग्याःचिकुया दथुइ जुइफइमखु धयादिल ।
“छुं नं ग्याःचिकु, धम्कीं न्याय सम्पादन जुइफइमखु, न्याय सम्पादन ग्यानाः ख्यानाः जुइफइमखु”, वय्कलं धयादिल, “सुशासन वास्तवय् न्यायालयया नुगः खः, संवैधानिक लोकतन्त्रया अभ्यास याइगु निकाय खः, संविधानं सरकारया सीमातय्गु नं क्वःछिइ, सुशासन स्थापना यायेत न्यायिक स्वतन्त्रता, निष्पक्षता व निडरतापाखें जक सम्भव जू ।” वरिष्ठतम् न्यायाधीश मल्लं संविधानं हे स्वतन्त्र न्यायापालिकाया परिकल्पना याःगु जूगुलिं न्यायिक स्वतन्त्रता छुं नं कथं सम्झौता जुइमफइगु न्ह्यथनादिसें धयादिल, “छुं नं भीडं ख्यानाः न्याय बिइ फइमखु ।”
वय्कलं मिस्त न्ह्याःवन धाःसा जक देय् न्ह्याःवनीगु न्ह्यथनादिसें राजनीतिक, आर्थिक, सामाजिक ख्यलय् गाः अझ नं दनिगु व अझ नं मिस्तय्सं अन्यायया बिस्कं महसुुस यानाच्वंगु जूगुलिं मिसा दिवस हनेमाःगु आवश्यकता जूगु धयादिल ।
वरिष्ठतम् न्यायाधीश मल्लं फुक्क ख्यलय् अर्थपूर्ण मिसा सहभागिता जरुरी जूगु न्हापाया तुलनाय् समाजय् ह्यूपाः वःगु न्ह्यथनादिसें मिस्तय्त अझ यक्व यायेफु धइगु धारणा तयादिल ।
सर्वोच्च अदालतया न्यायाधीश सारङ्गा सुवेदीं आः नं पलाःपतिकं क्षमताया परीक्षा बिइमाःगु अवस्था जूगुलिं मिस्तय्सं थःपिनिगु क्षमताय् विश्वास यानाः लिच्वः व इकथं ज्या यायेमाःगुलिइ बः बियादिल ।
महान्यायाधिवक्ता सविता भण्डारी बरालं मिस्तय्सं नेतृत्व क्षमता अप्वयेकाः न्यायया ख्यलय् न्याय, समानता, सहभागिता व समावेशीताया ख्यलय् ज्या यायेमाः धयादिल ।
नेपाल बार एसोसिएनया न्वकू सरस्वती श्रेष्ठं मिसा सशक्तीकरण, सहभागिता अझ नं यक्व आवश्यता जूगु व मिस्तय्सं यायेफु धइगु यक्व पुष्टि जुयावःगु धारणा तयादिल ।