नेपाली कांग्रेसया विशेष महाधिवेशन पक्षधरतय्सं येँया भृकुटीमण्डपय् ग्वसाः ग्वःगु विशेष महाधिवेशनया उलेज्या सत्र न्ह्याकूगु दु । विशेष महाधिवेशनया उलेज्या महामन्त्रीपिं गगनकुमार थापा व विश्वप्रकाश शर्मां मंकाः कथं यानादिल ।
थ्वहे पुस २७ व २८ गते ग्वसाः ग्वयातःगु विशेष विशेष महाधिवेशनया उलेज्या न्ह्यः स्वनिगःया थीथी थासं नेता, कार्यकर्ता भेला जुयाः र्याली, बाजं व झाँकीया नापं ग्वसाग्वःगु थासय् थ्यंकूगु खः । उलेज्या सत्रया निंतिं भृकुटीमण्डपया चकंगु ख्यलय् तःधंगु मञ्चया व्यवस्था यानातःगु दुसा मञ्चया न्ह्यने द्वलंद्वःया ल्याखय् नेता नापनापं कार्यकर्तापिं थ्यंकाच्वंगु दु ।
मञ्च जःखः कांग्रेसया ध्वाँय्, ध्वाखा, ब्यानर लिसें प्रचारप्रसारया सामग्री तयाः छायेपियातःगु दु । विशेष महाधिवेशनया सभापतित्व कांग्रेस येँ जिल्लया सभापति कृष्ण सबुज बानियाँं यानादीगु दु । विशेष महाधिवेशनया उलेज्या लिपा बन्दसत्र कन्हय् पुस २८ गते सुथय् निसें भृकुटीमण्डपया सभाहलमा जुइत्यंगु दु ।
वंगु असोज २९ गते कांग्रेसया ५४ दशमलव ५८ प्रतिशत महाधिवेशन प्रतिनिधिया ल्हाःचिं लिसें विशेष महाधिवेशन मागया नापं केन्द्रीय ज्याकुथिइ निवेदन दर्ता जूगु खः । विशेष महाधिवेशनया सन्दर्भय् पार्टीया संस्थापन पक्षं धाःसा असहमति प्वंकूगु दु ।
पार्टीया संस्थापन पक्षं नियमित महाधिवेशनया धलः क्वःछिनाः प्रक्रिया न्ह्याये धुंकूगुलिं विशेष महाधिवेशनया औचित्य स्वतः समाप्त जुइधुंकूगु धाःगु दु ।