देय् न्यंकंया नेवाः पत्रकारतय्गु मंकाःगु संगठन नेवाः पत्रकार राष्ट्रिय दबूया न्याक्वःगु तःमुँज्या थ्व हे वइगु ने.सं. ११४६ चौलागा दुतिया सनिवाः (चैत्र २१ गते शनिवार) याइगु जूगु दु । वंगु शनिवाः धादिङया जिवनपुरय् च्वंगु पत्रकार दबूया न्याक्वःगु केन्द्रीय समितिया मुँज्यांं उगु कथं निर्णय याःगु खः । पत्रकार दबूया केन्द्रीय नायः नृपेन्द्रलाल श्रेष्ठया नायःसुइ सल्लाहकापिं भाषा आयोगया दुजः सुरेश किरण मानन्धर, अधिवक्ता किरण शाक्य व पुस्करभक्त माथेमा तकं उपस्थित जुयादीगु उगु मुँज्यां तःमुँज्या याये न्ह्यः जिल्ला व प्रद्शया अधिवेशन यायेगु धकाः नं क्वःछिउगु दु । अधिवेशनया झ्वलय् निर्वाचन यायेगु नितिं अधिवक्ता किरण शाक्यया नेतृत्वय् संस्थापक नायः श्रीकृष्ण महर्जन व पुलांम्ह नायः सुरजवीर बज्राचार्य दुजः दुगु निर्वाचन समिति तकं नीस्वंगु दु । थुगु निर्वाचन समितिं प्रदेश व जिल्लाया अधिवेशनय् नेतृत्व ल्ययेगु नितिं ज्या याइ । तःमुँज्या न्ह्यः जिल्लाया अधिवेशन फागुन ५ गते तकया दुने यायेगु खँ क्वःछिउगु दु । थुगुसी पत्रकार दबूया न्याक्वःगु तःमुँज्या गोरखा जिल्लाय् यायेगु नितिं प्रस्ताव वःगु खःसा थाय्या बारे स्थालत अवलोकन नापं सम्वन्धित थाय्यापिं पत्रकारलिसे सहलह लिपा अन्तिम तुंगेयायेगु भाला केन्द्रीय सचिवालययात बिउगु दु ।