थ्व हे ने.सं. ११४६ थिंलाथ्व नवमि कुन्हु मिसा साहित्यकार मुनाया न्हापांगु ख्वाःपौ पिथनेगु ज्याझ्वः थनया सातोआकी स्मृति भवन, क्वपुंद्वलय् सम्पन्न जुल । संस्थाया नायः बिमलप्रभा बज्राचार्यजुया नायःसुइ व संस्कृतिविद प्रा.डा. चुन्दा वज्राचार्यया मूपाहाँसुइ न्ह्याःगु उगु ज्याझ्वलय् संस्थाया न्वकु दिव्या ताम्राकारं लसकुस यानादीगु खःसा संस्थाया सल्लाहकारपिं प्रा. प्रेमशान्ति तुलाधर, कवयित्री प्रतिसरा साय्मी व साहित्यकार ध्रुव मधिकःमिं भिंतुना न्वचु बियादिल । ज्याझ्वलय् प्रा. प्रेमशान्ती तुलाधर व वय्कःया केहेँ मय्जु समाजसेवी मोतिशान्ति शाक्यजुपिसं मां–बायागु नामं निगू लख तका दां अक्षकोषया निंतिं नायः बिमलप्रभा बज्राचार्यजुयात लःल्हानादिल । न्वकु बिमला मानन्धरं ज्याझ्वः न्ह्याकादीगु खःसा सभानायःपाखें सुभाय् न्वचु तसे ज्याझ्वः क्वचायेकादीगु खः ।
भिंतुना न्वचु बीगु झ्वलय् प्रा. प्रेमशान्तिजुं च्वमिपिसं समालोचना क्षेत्रय् नं च्वसा न्ह्याकेमाःगु खँय् बः बियादिल ।
कवयित्री प्रतिसराजुं पुलांपिं मिसा च्वमिपिंत मात्तुमालाः न्ह्योने हयेगु मिसा साहित्यकार मुनाया पलाःयात च्वछायादिल ।अथे हे साहित्यकार ध्रुव मधिकःमिजुं च्वमिपिं थःगु च्वसापाखें सन्तुष्ट जुइमज्यु, अझ बांलाकेगु मनय् तयाः च्वसा न्ह्याकांतुं वनेमाः धयादिल । मूपाहाँ प्रा. डा. चुन्दा वज्राचार्यजुं मिसा साहित्यकार मुनां आः र्राष्ट्रिय व अन्तर्राष्ट्रिय साहित्यिक संस्थातनाप आबद्ध जुयाः ज्या यानायंकेमाःगु व जेन्जी पुस्तायात नं नेपालभाषा साहित्य क्षेत्रय् हयेमाःगु खँ धयादिल ।
मिसा साहित्यकार मुनां दँय् छक्वः दँमुँज्याया इलय् अक्षकोषया दातापिं प्रा. प्रेमशान्ति व समाजसेवी मोतिशान्तिया मां ज्ञानदेवी व अबु मणिरत्न स्थापितया किपाय् स्वामाः क्वखायेकाः सम्मान यायेगु खँ क्वःछ्यूगु दु । मूपाहां नापं दायसय दिपिं सकसिनं ख्वाःपौया उलेज्या यानादिगु खः ।