नेपालभाषाया प्यंगःथां मध्ये छगः सेल्लागु थांकथं नेवाः समाजं कया वयाच्वंम्ह व्यत्तित्व गद्यगुरू पण्डित निष्ठानन्द वज्राचार्यया १६९ क्वःगु बुदिं हनेगु ज्या नेसं ११४६ थिंलाथ्व चौथि आइतवाःया दिनय् नबहिली झःझः धायक जूगु दु ।
वसपोलया बुदिंया लसताय् निष्ठानन्द स्मृति गुथि व ओलम्पस क्लया मंकाः ग्वसालय् ओमबहाःस्थित नःबहिलिइ च्वंगु वसपोलया झ्वाताय् नेपालभाषा सेवी व साहित्यकारपिन्सं श्रद्धापूर्वक स्वां देछाय्गु ज्या जूगु दु । उगु ज्याझ्वलय् मूपाहांया रुपय् नेपालभाषा एकेडेमिया चान्सलर एवं नेवाः न्ह्योलुवाः मल्ल के सुन्दरपाखें वसपोलया ज्वःमदुगु योगदानयात कयाः चर्चा यानादीगु दु ।
मूपाहां भाजु मल्लजुं थःगु खँ तयादीगु झ्वलmय् यदि पं। निष्ठानन्द बज्राचार्यजुं उगु इलय् संस्कृत भाषां च्वयातःगु ललित विस्तरयात नेवाःतयगु बोलिचालीया भाषां अनुवाद याना उगु सफू पिथनेगु ज्या मयागु जुसां थौं तकया ई थ्यंबलय् सायद नेपालभाषा लोप तकं जुइ धुंकूगु जुइफु धकाः नं धयादीगु दु ।
वयकलं विदेशया प्रख्यातगु भाषायात ईकथं रुपान्तरण याना मयंकूगुलिं थौं उगु भाषा लोप जुयाच्वंगु दसित नं न्ह्योब्वयादीगु खः । वयकलं थःगु खँ तयागु झ्वलय् परम्परागत रुपं न्ह्याना वयाचवंगु ज्याखँय् न्हूगु पलाm छिइ वलय् मछिं पहः जुयाच्वनीगु स्वभाविक जूगु खँ न्ह्योथनादिसें उगु इलय् नं पं निष्ठानन्दया विरोध याःपिं दयफूगु अनुमान यानादीगु दु । पं। निष्ठानन्द बज्राचार्यजुं उगु इलय् नेपालभाषां कठोर परिश्रम याना ललित विस्तरया सफू पिथनेगु ज्या याःगु हुनिं हे थौं द्धलंद्धः नेपालभाषाया सफू पिथनेगु ज्या जूगु खः धकाः नं धयादीगु दु ।
ओलम्पस क्वलया न्वकु ज्योतिरत्न शाक्यं न्ह्याकादीगु उगु ज्याझ्वः ओलम्पस क्लबया अध्यक्ष नापं नेवाः देय् दबू केन्द्रीय नायः पवित्र वज्राचार्यया सभापतित्वय् जूगु दु । थुगु ज्याझ्वलय् आपालं भाषासेवी व साहित्यकारपिनिगु उपस्थितिइ दुगु दु ।
उगु ज्याझ्वलय् सभापतिया थासं भाजु पवित्र बज्राचार्यजुं नं थःगु नुगः खँ तयादीगु खः । भाजु बज्राचार्यजुं थःगु नुगः खँया झ्वलय् थौंया ईलय् थीथी ब्वनेकुथिइ नेवाःतसें सिवें गैर नेवाःतसें नेपालभाषा ब्वनाच्वंगु खँ उलादीगु दु ।
हरेक दँया थिंलाथ्व चौथि कुन्हु गद्यगुरु निष्ठानन्द बज्राचार्यया बुदिं हना वसपोलया योगदानयात लुमंकेगु ज्या जुया वयाच्वंगु दु । नापं आपालं हे भाषा व साहित्यसेवीपिं वया श्रद्धा।स्वां देछायु ज्या याना वयाच्वंगु दु ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।