राष्ट्रपति रामचन्द्र पौडेलं अन्तरिम सरकारकथं नवनियुक्त प्रधानमन्त्री सुशीला कार्कीयात प्रधानमन्त्री पदया सपथ ग्रहण याकूगु दु । वय्कः नेपाःया ४२ म्हम्ह व न्हापांम्ह मिसा प्रधानमन्त्री जुयादी ।
राष्ट्रपति भवन शितल निवासय् थाैं बहनी ग्वसाःग्वःगु विशेष समारोहय् राष्ट्रपतिया न्ह्यःने वय्कलं पद व गोपनीयताया सपथ कयादीगु खः ।
राष्ट्रपति पौडेलं विसम व असाधारण परिस्थितिइ युवा पुस्तापाखें न्ह्यब्वःगु माग व आकांक्षा कथं, राजनीतिक दल व सरोकारवालातिलसे सहलह ब्याकाः वय्कःयात नियुक्त यानादीगु खः ।
राष्ट्रपति पौडेलं नेपाःया संविधानकथं राष्ट्रपतिइ निहित अधिकार छ्यलाः संविधानया पालना व संरक्षण लिसें राष्ट्रिय एकताया प्रवर्द्धन याये माःगुलिं राष्ट्राध्यक्षया हैसियतं प्रधानमन्त्रीया सिफारिशय् खुला दुने मेगु निर्वाचन क्वचायेकेगु यानाः अन्तरिम सरकारया प्रधानमन्त्रीइ वय्कःयात नियुक्त याःगु खः । सपथ ग्रहण ज्याझ्वलय् उपराष्ट्रपति, प्रधानन्यायाधीश, नेपाल सरकारया उच्च पदस्थ अधिकृत, सुरक्षा निकायया प्रमुख, नेपालस्थित कूटनीतिक नियोगया प्रतिनिधिपिनि ब्वति दुगु खः ।
जेनजीं ल्ह्वंगु मागया विषयस सहमति जुइवं पूर्वप्रधानन्यायाधीश कार्की प्रधानमन्त्रीइ नियुक्त जुयादीगु खः । नवनियुक्त प्रधानमन्त्रीं चीधंगु मन्त्रिमण्डल दयेकीगु व उगु मन्त्रिमण्डलं याइगु सिफारिशया लिधंसाय् सरकारया प्राथमिकताया थप ज्या न्ह्यज्याइगु धाःगु दु ।
जेनजीं देसय् सुशासन, न्हूपुस्ताया नेतृत्व व निस्क्रिय दयेकूगु सामाजिक सञ्जालया सञ्चालनया माग तसें ग्वसाःग्वःगु प्रदर्शनी व वधुंकाः जूगु घटनाय् तःधंगु जनधनया क्षति जूगु खः ।
उगु घटनालिपा तत्कालिन सरकारया प्रधानमन्त्री केपी शर्मा ओलीं राजिनामा बिइवं उगु आन्दोलनया मागकथं पूर्वप्रधानन्यायाधीश कार्कीया नेतृत्वय् न्हूगु सरकार स्वंगु खः ।
देसय् आकाझाकां हिउगु राजनीतिक परिस्थिति व अन्यौलया लकसय् नेपाली सेनाया पहलय् कथहं कानुनी राज्य व अमनचयन कायम यासें वार्ता व संवादपाखें न्हूगु सरकार स्वनेत सफल जूगु खः ।
सेनां इतिहासनिसें हे प्राप्त जिम्मेवारीयात संविधान सम्मतढङ्गं प्रजातान्त्रिक–मूल्य मान्यताया लिधंसाय् जिम्मेवारी बहन यानावयाच्वंगु दु ।
तसकं जटिलपूर्ण अवस्थाय् संयम जुयाः म्हाे इलय् परिस्थितियात सहजरूपय् अवतरण याकेत सफल जूगु दु ।
नेपाःया न्हापांम्ह मिसा प्रधानमन्त्री जुयादीम्ह कार्की थ्वयांन्ह्यः ताःई वकालत यासें सर्वाेच्च अदालतया न्यायाधीश जुजुं प्रधानन्यायाधीश जुयादीगु खः। न्यायालयदुने प्रष्ट विचार, खरो स्वभाव व इमान्दार छवी दयेकादीम्ह वय्कःया नेतृत्वया सरकारं क्वःछिनातःगु ईदुने स्वच्छ, स्वतन्त्र व निष्पक्ष निर्वाचन याकाः न्हूगु सरकारयात सत्ता हस्तान्तरण याइगु भलसा काःगु दु ।
न्हू नियुक्त जूम्ह प्रधानमन्त्री सुशिला कार्कीयात राष्ट्रपति पाैडेललिसें सपथ ग्रहण ज्याझ्वलय् ब्वति कयादीपिसं भिंतुना देछाःगु दु ।
सपथ ग्रहण समाराेहय् थीथी दलया नेतातय्गु ब्वति धाःसा मदु ।