राष्ट्रपति रामचन्द्र पौडेल व सभामुख देवराज घिमिरे बिहीबाः नापलानाः सहलह यानादीगु दु । नापलायेगु झ्वलय् देय्या लिपांगु राजनीतिक अवस्था व समसामयिक विषयय् सहलह जूगु सभामुखया सञ्चारविज्ञ शेखर अधिकारीं धयादिल । उगु इलय् वर्तमान राजनीतिक निकासया बारेय् वय्कःपिं दथुइ सहलह जूगु खः । सभामुखनाप नापलायेगु झ्वलय् राष्ट्रपति पौडेलं संविधानया भावना कथं संविधान दुने हे च्वनाः राजनीतिक निकास मालेगु धयादीगु खः । थ्वहे भदौ २३ गते लिपा विकास जूगु राजनीतिक घटनाक्रमया बारेय् राष्ट्रपति पौडेल व सभामुख दथुइ सहलह जूगु व माःकथं निकासया बारेय् विचाः तयादीगु धकाः धाःगु दु । वय्कःपिं दथुइ नापलाःगु यात महत्व बियाः कयातःगु दु ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।