स्वनिगःया जनजीवन सामान्य जुजुं वल

 ‘जेनजी’ आन्दोलन लिपा शान्तिसुरक्षा असहज जुयाः वंगु स्वनिगःया जनजीवन सामान्य जुजुं वयाच्वंगु दु । शान्ति सुव्यवस्था कायम यायेगु झ्वलय् अझं नं निश्चित ई क्वःछिनाः निषेधाज्ञा व कफ्र्यू कायम याःसां सुथय् व सनिलय् या ई न्हिया न्हिथं जनजीवन सामान्य जुजुं वयाच्वंगु दु । अथे हे सरकारी ज्याकुथि, बैंक लिसें वित्तीय संस्था, व्यापार व्यवसाय नं चालावःगु दु । सतकय् मजिकंमगाःगु सेवाया नापनापं सरकारी, निजी सवारीसाधनत वयेवने यायेधुंकूगु दु । चुकय् चुकय् सेनालिसेंया सुरक्षा निकायया गस्तीं यानाः नागरिकतय्सं सुरक्षित तायेकूगुलिं जनजीवन अःपुनावःगु खः । आन्दोलनया झ्वलय् विस्थापित जूगु प्रहरी ज्याकुथिं सेवा बियावये धुंकूगु केन्द्रीय प्रहरी प्रवक्ता प्रहरी नायब महानिरीक्षक विनोद घिमिरें धयादिल । खास यानाः स्वनिगःया सहरी लागाय् सुथ न्हापांनिसें न्हिया न्हिथंया नसात्वँसा न्यायेमिइत भीड हे खनेदु । बनेज्यामिं कालीमाटी, बल्खु, माछापोखरी, लगनख्यःलिसेंया थासय् वनाः तरकारी व सिसाबुसा लिसें दुरु सङ्कलन यानाः मियाच्वंगु दु । आन्दोलनया झ्वलय् मिं तयाब्यूगु व तोडफोड जूगु भवन व संरचनाया सुचुकुचु, फोहर व्यवस्थापन ज्या न्ह्यानाच्वंगु दु । सिंहदरबार दुनेया मन्त्रालय लिसें ज्याकुथिया कर्मचारी नं सेवा प्रवाह अःपुकेत व न्हिया न्हिथंया ज्या यायेगु वातावरण दयेकेत खटे जुयाच्वंगु दु । सतकय् नापलाइपिं अप्वः धयाथें मनूत क्षतिया खँ ल्हाइबले पुरातात्विक महत्वया प्रमुख राजनीतिक प्रशासनिक केन्द्र सिंहदरबार मिं तयाब्यूगुलिं चिउता व दुःख प्वंकाच्वंगु न्यनेदु । मिं च्यानाः नष्ट जूगु संसद भवन, सिंहदरबार लिसें व्यावसायिक भवनय् जूगु क्षति स्वः वइपिं म्वःम्वः खनेदु । आन्दोलनया झ्वलय् जूगु तोडफोड व मिं च्यानाः प्रमुख प्रशासनिक केन्द्र सिंहदरबारया प्रधानमन्त्री लिसें मन्त्रिपरिषद्या ज्याकुथि, ऊर्जा, जलस्रोत लिसें सिँचाइ, अर्थ, शिक्षा, विज्ञान लिसें प्रविधि, सङ्घीय मामिला लिसें सामान्य प्रशासन, स्वास्थ्य लिसें जनसङ्ख्या, भौतिक पूर्वाधार लिसें यातायात मन्त्रालयय् नं सुचुकुचुया ज्या जुयाच्वंगु खनेदु । –––