सशस्त्र प्रहरी बल, नेपालं आपराधिक ज्याखँ जूगु लुयावःसा थःपिनिगु टोल फ्रि ल्याः १११४ वा मेगु सुरक्षा निकायय् थत्थें जानकारी बियाः ग्वाहालि यायेत इनाप याःगु खः । प्रधान ज्याकुथिं थौं विज्ञप्ति पितबिसें थौंया विषम परिस्थिति सामान्यीकरण जुयावनाच्वंगु इलय् छम्हनिम्ह व्यक्ति वा पुचलं थी थी आपराधिक ज्याखँ यायेफु धासें अथे जूसा वा जूगु खंसा खबर यायेत इनाप याःगु खः । विज्ञप्तिइ धयातःगु दु, “सञ्चारमाध्यम नापं सामाजिक सञ्जालपाखें तथ्यहीन भ्रामक प्रचारप्रसार यायेगु व परिस्थितिया अनुचित फाइदा कयाः सीमा अपराधलिसें लुटपाट, मिँ तइगु थेंजाःगु ज्याय् संलग्न जुयाः आपराधिक ज्याखँ जुइफूगु धासें उकियाबारे टोल फ्रि ल्याः १११४ य् जानकारी यायेत इनाप दु ।” अथेहे देशय् शान्ति व सुव्यवस्था कायम यानाः जनताया म्ह, धन व स्वतन्त्रताया संरक्षण यायेत न्ह्याथेंजाःगु विषम् परिस्थितिइ नं सशस्त्र प्रहरी बल देय् व जनताया सेवाय् प्रतिबद्ध जुयाः पूर्ण संयमता जुयाः परिचालन जुयाच्वंगु नं धाःगु खः । प्रहरी बलं राज्यपाखें लःल्हाःगु मुख्य कार्यदिशाअन्तर्गत सीमा सुरक्षाय् थःगु भालापाखें विचलित मजूसे अन्तरराष्ट्रिय सीमापाखें जुइफूगु छुं नं कथंया सीमा अपराध, घुसपैठ नापं अतिक्रमणथेंजाःगु ज्याखँ नियन्त्रण यायेत प्रभावकारी जुइक परिचालन जुयावयाच्वंगु नं धाःगु खः । थुकिया निंतिं सीमाय् वनाच्वंपिं समकक्षीलिसें स्वापू दूगु मेमेगु निकायलिसे मद्दिक समन्वय जुयाच्वंगु नं विज्ञप्तिइ धयातःगु खः ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।