नवनियुक्त स्वम्ह मन्त्रीपिंसं थौं पद लिसें गोपनीयताया शपथ कयादीगु दु । राष्ट्रपति रामचन्द्र पौडेलं राष्ट्रपति ज्याकुथि शीतल निवासय् थौं ग्वसाः ग्वःगु विशेष समारोहय् नवनियुक्त मन्त्रीपिं रामेश्वर खनाल, कुलमान घिसिङ व ओमप्रकाश अर्यालयात शपथ याकादीगु खः । राष्ट्रपति रामचन्द्र पौडेलं अन्तरिम सरकारया प्रधानमन्त्री सुशीला कार्कीया सिफारिसय् वय्कःपिंत आइतवाः सनिलय् नियुक्त यानादीगु खः ।
नवनियुक्त मन्त्रीतमध्ये खनालयात अर्थ, घिसिङयात ऊर्जा, जलस्रोत लिसें सिँचाइ, भौतिक पूर्वाधार लिसें यातायात व सहरी विकास मन्त्रालयया भाला बियातःगु दुसा अर्यालयात गृह व कानुन, न्याय लिसें संसदीय मामिला मन्त्रालयया भाला बियातःगु दु । प्रधानमन्त्री कार्कीं ल्यंगु मन्त्रालयया भाला कयादीगु दु ।
खनाल पूर्व अर्थ सचिव, घिसिङ नेपाल विद्युत् प्राधिकरणया पूर्वकार्यकारी निर्देशक व अर्याल अधिवक्ता जुयादीधुंकूगु दु । खनालं आर्थिक सुधार व सुशासनया क्षेत्रय् ज्या याना वयाच्वनादीगु दुसा घिसिङं प्राधिकरणया भाला त्वःफिइ धुंकाः नागरिकया सः ल्ह्वनाः वयाच्वनादीगु दु । अधिवक्ता अर्यालं अख्तियार दुरुपयोग अनुसन्धान आयोगया तत्कालीन प्रमुख आयुक्त लोकमानसिंह कार्कीया नियुक्तिया अयोग्यतासम्बन्धी मुद्दाय् पुनरावेदन तयेधुंकाः चर्चाय् वयादीम्ह खः । नवनियुक्त मन्त्रीपिंसं थौं हे सिंहदरबारय् पदबहाली यानादीगु धयातःगु दु ।
उगु झ्वलय् उपराष्ट्रपति रामसहायप्रसाद यादव, प्रधानमन्त्री कार्की, प्रधानन्यायाधीश प्रकाशमानसिंह राउत, राष्ट्रियसभाया नायः नारायणप्रसाद दाहाल, पूर्वप्रधानमन्त्री डा बाबुराम भट्टराई, संवैधानिक निकायया प्रमुख लिसें पदाधिकारी, नेपाल सरकारया उच्चपदस्थ अधिकृत, सुरक्षा निकायया प्रमुख लिसें अधिकारीलिसें नं ब्वति कयादीगु खः ।
‘जेनजी’ समूहया आन्दोलन व पिहांवःगु परिस्थितिया दथुइ राष्ट्रपति पौडेलं पूर्वप्रधानन्यायाधीश कार्कीयात थ्वहे भदौं २७ गते अन्तरिम सरकारया प्रधानमन्त्रीइ नियुक्त यानादीगु खः ।