वा व सहकालया द्यः इन्द्रया पुजा–आराधना यानाः थौं परम्परागत रूपं येँयाः न्यायेकेत्यंगु दु ।
दँय्दसं भाद्र शुक्ल चतुर्दशीकुन्हु न्यायेकीगु थ्व नखः येँ, यल, ख्वप, धौख्यः, द्वाल्खालिसेंया थासय् न्यायेकी ।
भाद्र शुक्ल द्वादशीकुन्हु हनुमानध्वाखा न्ह्यःने धार्मिक विधि यानाः इन्द्रध्वजालिसेंया यःसिं थनेधुंकाः न्ह्याइगु थ्व जात्रा थी थी कथंया प्याखं, रथयात्रा र द्यःतय्गु पुजाआजा यानाः च्यान्हुतक न्यायेकीगु प्रचलन दु ।
भाद्र शुक्ल द्वादशीकुन्हु धस्वाकूगु यःसिंयात ‘इन्द्रध्वजोत्थान’ नं धाइ । यःसिंया क्वय् भैरवया पुजा याइ । शत्रु बुइधुंकाः त्याःगुया लसताय् न्यायेकीगु नखःकथं येँयाः न्यायेकावयाच्वंगु खः ।
इन्द्रध्वजया पुजा यानाः शक्ति दयेकाः प्रदर्शन यायेगु नखःकथं नं येँयाःयात काइ ।
थ्वस्वयांन्ह्यः तान्त्रिक विधिं पुजा यानाः ख्वपया चितपोल जङ्गलय् त्वःतूम्ह दुगुचां थ्यूगु सिमा भाद्र शुक्ल द्वितीयाकुन्हु क्वःथली ।
क्वःथलेधुंकाः यःसिंयात स्वनिगः दुतहयेत नं साइत स्वइ । स्वनिगलय् दुतहयेधुंकाः छचा भोटाहिटीइ तयाः एकादशीकुन्हु विधिपूवंकाः इन्द्रध्वजाया यःसिं दयेकेगु याइ ।
थौंया दिं मुख्य रूपं न्यायेकीगु येँयाः नखलय् राष्ट्रपतिं हनुमानध्वाखाया गद्दी बैठकय् जीवित द्यः कथं दुपिं श्री गणेश, श्री भैरव व श्री कुमारीया रथयात्रा स्वःझाइगु परम्परा दु । राजतन्त्र दतले जुजुपाखें श्री गणेश, श्री भैरव व श्री कुमारीया रथयात्रा स्ववइगु परम्परा दूगु खः ।
इन्द्रध्वजाया यःसिं धस्वाकेधुंकाः सुरु जूगु जात्राज्वःछि भक्कुप्याखं, महाकालीप्याखं, लाखेप्याखं, दशअवतार नापं देवराज इन्द्रया वाहन ऐरावत किसिया प्रतीककथं पुलुकिसी प्याखं हुइकीगु याइ ।
इन्द्रध्वजाया यःसिं धस्वाकूगु च्यान्हुलिपा अथे धइगु आश्विन कृष्ण चौँथीकुन्हु ‘इन्द्रध्वज पातन’ याइगु अथे धइगु क्वःथलीगु विधान दूगु “भरणी नक्षत्रया चान्हय् क्वःथलीगु शास्त्रीय व्यवस्था दु, ‘भरण्यां निशि पातयेत्’ धकाः न्ह्यथनातःगु दु”, धर्मशास्त्रविद् तोयराज नेपालं धयादिल ।
थुगु झ्वलय् थौं स्वनिगःया पश्चिमय् लाःगु दहचोकया इन्द्रदहय् चच्छि मद्यंसे भाद्र शुक्ल पुन्हिंकुन्हु आइतबाः म्वः ल्हुयाः मेलाय् वइपिं भक्तजनतय् म्वःम्वः जुइ । अनन्त चतुर्दशी भाद्र शुक्ल चतुर्दशीकुन्हु अनन्तनाथ (भगवान् विष्णु)या पुजा आराधना नं याइ । उकिं थ्व दिंयात अनन्त चतुर्दशी नं धायेगु याः ।
थौं च्वखगु सुकाय् अनन्त मन्त्रण यानाः चितधाःसा दच्छियंकं भिं जुइ धइगु विश्वास दु । श्रावण शुक्ल पुन्हुकुन्हु छुं कारणं यानाः जनै (यज्ञोपवीत) मन्त्रन कायेमखंपिंसं थौं हे मन्त्रन याइगु शास्त्रीय विधान दूगु धर्मशास्त्रविद् नेपालं कनादिल । अनन्त चतुर्दशीया व्रत नं थौं यायेमाःगु समितिं धाःगु दु । चतुर्दशीकुन्हु येँयाः न्यायेकेधुंकाः पुन्हिकुन्हु इन्द्रदहय् वनाः म्वः ल्हुइमाःगु धार्मिक विधि दु ।