नेवाः राष्ट्रिय मुक्ति मोर्चाया येँ महानगर सम्मेलन क्वचाल

‘नेवाः मुक्ति आन्दोलन अझं पूवंगु मदुनी’ – शशि श्रेष्ठ
येँ । राजधानी येँय् नेवाःतय्‌गु हकहित, अधिकार व भविष्यया नेवाः आन्दोलनया मुद्दाय् सहलह यानाः नेवाः राष्ट्रिय मुक्ति मोर्चा न्हापांगु येँ महानगर सम्मेलन क्वचागु दु । सम्मेलनं मोर्चाया न्हूगु नेतृत्व ल्यसें नेवाः मुक्ति आन्दोलनयात अझ संगठित व योजनाबद्ध ढंगं न्ह्योने यंकेगु घोषणा याःगु दु ।
सम्मेलनं नायो पदय् ज्योति बज्राचार्ययात निर्वाचित याःगु दु । न्वकुखय् न्हुच्छे कृष्ण श्रेष्ठ, किरण महर्जन र निर्मला सिं डंगोल, छ्याञ्जेय् गोपाल महर्जन, दांभरि पदय् मिन्दुरत्न बज्राचार्य, ल्यूछ्याञ्जेय् कृष्णलाल नकर्मि व ल्यूदांभरिइ सिता श्रेष्ठ निर्वाचित जूगु दु । अथे हे सचिवालय दुजः पदय् ज्ञानेन्द्र महर्जन व बसन्त श्रेष्ठ निर्वाचित जूगु दुसा ३३ म्ह मोर्चा महानगर कार्यसमिति दुजः ल्यःगु दु ।
सम्मेलनया उलेज्या माओवादी केन्द्रया स्थायी समिति दुजः शशि श्रेष्ठं त्वादेवाय् मत च्याकाः औपचारिककथं न्ह्याकादीगु खः । मूपाहाँ शशि श्रेष्ठं नेवाःतय्‌गु राजनीतिक, सांस्कृतिक व आर्थिक मुक्तिया संघर्ष अझं पूमवनिगु न्हथसें धयादिल “नेवाः समाजय् समाजवादया भ्रूण अझं ल्यनाच्वंगु व उकियात म्हसिकाः समाजवादया आधार दयेकेगु थौंया चुनौति जूगु वाःचायेकेमाःगु दु ।” वय्‌कलं नेवाः मुक्ति आन्दोलन केवल जातीय पहिचानतक सीमित मखसे मुक्कं समाजवादी आन्दोलननाप स्वानाच्वंगु खँय् जोड बियादिल ।
सम्मेलनय् बागमती प्रदेश सरकारी कामकाजया भाषा ऐन २०८० कार्यान्वयनय् नेतृत्वदायी भूमिका म्हितादीम्ह बागमती प्रदेशया पूर्व संस्कृति, पर्यटन तथा सहकारी मन्त्री शैलेन्द्रमान बज्राचार्ययात विशेष सम्मान यात । सम्मान ग्रहण यासें वय्‌कलं नेवाःतय्‌सं आवलिं योजनाबद्ध ढंगं आर्थिक उत्पादन व समृद्धिइ ध्यान बिइमाःगु खँ कनादिल । वय्‌कलं भाषा संस्कृति जक मखु , आर्थिक सबलता मदयेकं समाजवाद सम्भव मदुगु व योजनाबद्ध आर्थिक अभियानय् न्ह्यज्याये मफुसा नेवाः आन्दोलन पूवने मफइगु खँय् जोड बियादिल ।
अथे हे माओवादी केन्द्रया स्थायी समिति दुजः विजय सैजुं आत्मनिर्णयया अधिकार, स्वशासन व स्वायत्तताया न्ह्यसःयात मोर्चां थःगु मू एजेण्डा दयेकेमाःगु खँ धयादिल । वय्‌कलं नेवाःतय्‌सं मेगु आदिवासी समुदाययात नं गोलबन्द यानाः न्ह्योने वनेफुसा जक आन्दोलन ताःलाई धयादिल । वय्‌कलं नेपाःया संघीय संरचनादुने आदिवासी जनजातिया अधिकार पलिस्थाया नितिं सामूहिक आन्दोलन आवश्यक जूगु खँय् ध्यानाकर्षण यानादिल ।
माओवादी केन्द्रया केन्द्रीय दुजः व नेवाः मोर्चाया इन्चार्ज दिलिप महर्जनं येँ महानगरय् च्वनिपिं नेवाःत समाज परिवर्तनया आधारशिला जूगु धयादिल । वय्‌कलं थःगु न्वचुया झ्वलय् लुमंका दिल कि, येँया नेवाःत मदंतले देशय् तःधंगु परिवर्तन सम्भव जूगु मदु व समाजवादी क्रान्तिया अग्रपंक्तिइ येँया नेवाःत दनाः नेतृत्व यायेमाःगु दु ।
अथे हे माओवादी केन्द्रया जिल्ला इन्चार्ज हिमाल शर्मां पार्टी नेवाःतय्‌गु हकहित व अधिकारया नितिं प्रतिबद्ध दु धयादिसें पार्टीया नेवाः–तामाङ जागरण अभियान निरन्तर जारी दुगु खँ कनादिल । सम्मेलनय् नेवाः मोर्चाया महासचिब रविन्द्र महर्जन, माओवादी केन्द्रया केन्द्रीय दुजःपिं रविन्द्र श्रेष्ठ, नागेन्द्र खड्का, केन्द्रीय सल्लाहकार धनलाल महर्जन, माओवादी केन्द्र येँ जिल्ला नायो सञ्जय लामा व छ्याञ्जे महेश्वर फुँयाल लिसें महानगर समिति संयोजक निरज लामा झायादीगु खः ।
सम्मेलनया उलेज्या सत्र ग्वसाः खलःया कजि धर्मदेव महर्जनया नायोसुइ जूगु खः । उदघोषण गंगादेवी महर्जनं यानादीगु खःसा बन्द सत्रय् निर्वाचन समितिया कजि मोर्चाया सल्लाहकार सरिता महर्जन जुयादीगु खः । निर्वाचन समितिया दुजलय् मोर्चाया केन्द्रीय नायो उमेश स्थापित व न्वकु कृष्णबहादुर महर्जन च्वनादीगु खः । बन्दसत्रय् सम्मेलन आयोजक समितिया कजि धर्मदेव महर्जनं न्ह्यब्वयादीगु राजनीतिक–सांगठनिक प्रतिवेदनयात संशोधन यासें अनुमोदन याःगु जुल ।
न्हूम्ह निर्वाचित नायो ज्योति बज्राचार्यं थःगु सम्बोधनय् येँया नेवाःतय्‌सं फयेमालाच्वंगु भूमि विस्थापन, सांस्कृतिक सम्पदाय् जुयाच्वंगु अतिक्रमण व भाषिक–आर्थिक विभेदयात मू चुनौतीया रुपय् कयागु दु धयादिसें येँया नेवाःतय्‌त संगठित यानाः थज्याःगु अन्यायविरुद्ध संघर्षया कार्यक्रम हयेगु प्रतिवबद्धता प्वंकादिल ।
थुकथं नेवाः राष्ट्रिय मुक्ति मोर्चाया थुगु सम्मेलनं येँया नेवाःतय्‌सं थःपिनिगु अस्तित्व, पहिचान व अधिकारया नितिं संघर्षयात निरन्तरता बीगु स्पष्ट याःगु दु । राजधानीइ आदिवासी अधिकारया आन्दोलनयात सशक्त यायेगु, ऐतिहासिक सांस्कृतिक सम्पदाया रक्षा यायेगु व आर्थिक क्षेत्रय् योजनाबद्ध पलाः ल्होनेगु सम्मेलनया मू निर्णय खनेदु । विशेष यानाः न्हूगु नेतृत्वं भाषिक विभेदविरुद्ध सः तयेगु, आदिभूमिं विस्थापन पनेगु व समाजवादया लँपुइ न्ह्याःवनेत आर्थिक उत्पादनय् जोड बीगु प्रतिवद्धता प्वंकुगु सम्मेलनया उपलब्धिकथं खनेदु ।
नेवाः राष्ट्रिय मुक्ति मोर्चाया महानगर सम्मेलन संगठनात्मक नेतृत्व चयन जक सीमिति मजुसें नेवाः मुक्ति आन्दोलन पूमवनिगु व थुकियात समाजवाद, आत्मनिर्णय व स्वायत्तताया न्ह्यसःनाप स्वायेगु राजनीतिक सन्देश बीत ताःलाःगु खनेदु । समाजवादी क्रान्तिया म्हगस, भाषा संस्कृति संरक्षणया जिम्मेवारी व आर्थिक उत्पादनया चुनौती दथुइ नेवाः आन्दोलनं गज्याःगु मोड काइ धैगु खँ नेवाःतय्‌गु आन्दोलनं हे क्वःछिइगु खनेदु ।