अन्तरराष्ट्रिय विमानस्थलं अष्ट्रेलिया उडान जुइगु जूगु दु । चीनया सिचुवान एयरलाइन्सं छेन्दु जुकाः अष्ट्रेलिया उडान यायेगु तयारी याःगु खः । उगु प्रयोजनया निंतिं सिचुवान एयरलाइन्सं नियामक निकाय नागरिक उड्डयन प्राधिकरणनाप अनुमति फ्वंगु दु ।
प्राधिकरणया सुचं अधिकारी ज्ञानेन्द्र भूलया कथं सिचुवान एयरलाइन्सं छेन्दु जुकाः अष्ट्रेलिया उडानया अनुमति फ्वंगु खः । उडान अनुमतिया निंतिं अनौपचारिक सहलह जूगु व माःगु प्रक्रिया पूवंकाः अनुमति बिइगु तयारी यानागु धकाः वय्कलं धयादिल ।
आः वइगु सेष्टेम्बरनिसें उडान यायेगु कम्पनीं योजना दयेकाच्वंगु दु । “सिचुवान एयरलाइन्सं पोखरां अष्ट्रेलिया उडान यायेगु योजना दयेकूगु दु । पोखरां छेन्दु जुकाः अष्ट्रेलिया उडान यायेगु बारे अनौपचारिक खँल्हाबल्हा जूगु दु । औपचारिक कथं प्रक्रिया पूवंकेगु विषयय् निगूपक्ष दथुइ सहलह जुयाच्वंगु दु । याकनं उडान धलः सम्बन्धित वायुसेवापाखें न्ह्यब्वइगु जुइ”, सुचं अधिकारी भूलं धयादिल ।
थ्व उडान जुसा अष्टे«लिया वये–वने याइपिं नेपाःमितय्त अःपुइगु विश्वास यानातःगु दु ।
थ्वसिबें न्ह्यः सिचुवान एयरलाइन्सं पोखरा विमानस्थलय् छुं ई चार्टर उडान याःगु खः । कम्पनीं न्हूगु गन्तव्यया कथं अष्ट्रेलिया नियमित उडान याये मं तःगु खः । विसं २०८० असार ६ गते उगु एयरलाइन्सया एयरवस ‘ए’ ३१९ न्हापांगुखुसिइ पोखरा विमानस्थलय् उडान याःगु खः । असार ८ व ९गते फेवातालय् जूगु ‘नेपाल–चाइना फ्रेन्डसिपया ड्रागन बोट रेस फेस्टिभल २०२५’य् ब्वति कायेत चिनियाँ प्रतिनिधि, कासामि, स्वकुमिंलिसेंया पर्यटकतय्त हयेगु व यंकेगुु निंतिं चार्टर्ड उडान याःगु खः ।
पोखरा अन्तरराष्ट्रिय विमानस्थलया महाप्रबन्धक जगन्नाथ निरौलाया कथं पोखराय् हिमालय एयरलाइन्सं जक नियमित उडान यानाच्वंगु दु । कम्पनीं आः वइगु सेप्टेम्बरनिसें अष्टेलिया उडान यायेगु योजना दयेकूगु दु ।
थ्वहे दथुइ भुटानया निजी वायु्सेवा कम्पनी भूटान एयरलाइन्स ९टासीं० नं पोखरा विमानस्थलय् चार्टर्ड उडान यायेगु तयारी याःगु दु । एयरलाइन्सं पोखरां पारो इन्टरनेसनल एयरपोर्टया निंतिं निगू÷स्वंगू चार्टर्ड उडानया अनुमति फ्वंगु प्राधिकरणया सुचं अधिकारी भूलं धयादिल । वय्कःया धथं भूटान एयरलाइन्सं आः वइगु सेप्टेम्बर २८ व अक्टोबरय् प्यन्हूगु यात्रु चार्टर्ड उडानया निंतिं अनुमति फ्वंगु खः ।
भूटान एयरलाइन्सं न्हापांनिसें हे उडान यायेगु धयाच्वंगु खः । “चार्टर्ड उडान दिगो जुसा येँ थें हे पोखरा व भैरहवां छगू देय्या एयरलाइन्सयात पोखरा जुकाः मेगु देय् वने दइगु उडान ‘फिफ्थ फ्रिडम फ्लाइट’ बिइगु धकाः न्हापा हे निर्णय जूगु दु । न्हापा भूटान एयरलाइन्सं येँ–पारो–येँ उडान याइ । उडान नियमित जुसा पारो–पोखरा–दिल्ली व दिल्ली–पोखरा–पारो उडान यायेगु एयरलाइन्साया योजना दु”, सुचं अधिकारी भूलं धयादिल । भूटान एयरलाइन्सयात छुं दिनय् हे उडान अनुमति बीगु प्राधिकरणं धाःगु दु ।
आः हिमालय एयरलाइन्सं पोखरा अन्तरराष्ट्रिय विमानस्थलय् वालय् छन्हु जक नियमित उडान यानाच्वंगु दु । येँ–ल्हासा–पोखरा–ल्हासा–येँ स्वाइगु यानाः हिमालयं उडान सञ्चालन यानाच्वंगु दु । पोखरा अन्तरराष्ट्रिय विमानस्थल सञ्चालनय् वःगु निदँ लिपा हिमालयं न्हापांगु व्यावसायिक उडान न्ह्याकूगु खः । विमानस्थलय् हिमालयया नापनापं सिचुवान व भूटान एयरलाइन्सया उडान जुसा विमानस्थल चलायमान जुइगु व थःथःगु गन्तव्यय् वनीपिं यात्रुतय् निंतिं नं अःपुइगु प्राधिकरणया विश्वास दु ।
राष्ट्रिय गौरवया आयोजनाया कथं दूगु पोखरा अन्तरराष्ट्रिय विमानस्थल विसं २०७९ पुस १७ गते उलेज्या जूगु खः । त्रिभुवन अन्तरराष्ट्रिय विमानस्थल सञ्चालनय् वःगु ७१ दँ लिपा देय् दुने निगूगु अन्तरराष्ट्रिय विमानस्थलया कथं रुपन्देहीया भैरहवाय् गौतमबुद्ध अन्तरराष्ट्रिय विमानस्थल सञ्चालनय् वःगु खः । उकिया खुला लिपा पोखरा अन्तरराष्ट्रिय विमानस्थलया उलेज्या जुल । थ्व विमानस्थलय् अन्तरराष्ट्रिय उडान तब्यायेगु झ्वलय् दु ।
स्वद्वः व गुसःपी क्षेत्रफलय् न्यनाच्वंगु पोखरा विमानस्थल थ्यंमथ्यं २२ अर्ब लाय्खय् निर्माण जूगु खः । दँय् च्यागू लख यात्रुयात सेवा बिइगु क्षमताया थ्व विमानस्थलय् निद्व व न्यासः मिटर हाकः व पीन्यागू मिटर व्याया धावनमार्ग दु ।
आः भूटानया सरकारी वायुसेवा कम्पनी डु«क एयर व भूटान एयरलाइन्सं येँय् नियमित उडान यानाच्वंगु दु । भूटान एयरलाइन्सं ‘फिफ्थ फ्रिडम फ्लाइट’ छ्यलाः पारो–येँ–दिल्ली व दिल्ली–येँ–पारो जुकाः वालय् प्यंगू उडान यानाच्वंगु दु । ड्रुक एयरं पारो–येँ–पारो–दिल्ली–येँ ‘ओभर फ्लाइट’ यानाच्वंगु दु । आः वइगु सेप्टेम्बर २८ व अक्टोबरय् प्यन्हू यात्रु चार्टर्ड उडान अनुमति कयाः सेवा सञ्चालन जुसा उकिं नं थुकिया प्रचाय् तिवः दइगु विश्वास यानातःगु दु ।
प्राधिकरणया कथं चार्टर्ड उडान अनुमति बिइत छुं समस्या मदुसां नं नियमित उडानया निंतिं धाःसा आः पोखरा व भैरहवा वेस जुयाः उडान यायेगु यानाः अनुमति बिइगु जुइ । नेपालं आः ४२ गू देय्नाप हवाई सेवा सम्झौता याःगु दु । हवाई सम्झौता न्हूधाः याइबलय् भैरहवा व पोखरा उडान थपे याइगु दु । छुं नं वायुसेवा कम्पनीयात पोखरा व भैरहवां चार्टर्ड उडान याकेबिइत छुं समस्या मदूगु सुचं अधिकारी भूलं धयादिल । प्राधिकरणया विवरणय् त्रिभुवन अन्तरराष्ट्रिय विमानस्थल जुयाः नेपाःया स्वंगु हवाई सेवा प्रदायक कम्पनीलिसें ३०गू एयरलाइन्सं अन्तरराष्ट्रिय उडान याना वयाच्वंगु दु ।
भैरहवाय् जजिरा व थाई एयर एसियां उडान याइगु
भैरहवाया गौतमबुद्ध विमानस्थलय् जजिरा एयरवेज व थाई एयर एसियां हाकनं उडान सञ्चालन याइगु जूगु दु । थुपिं निगूलिं एयरलाइन्सं न्हापा नं भैरहवा उडान यानाः स्थगित याःगु खः । थाई एयर एसियां अक्टोबर २६ निसें न्ह्याइगु ‘विन्टर सेडुअल’य् उडान यायेगु यानाः तयारी याःगु दु । वालय् निगू उडान यायेगु एयरलाइन्सया योजना दु । अथे हे, जजिरा एयरं नं विन्टर ‘सिजन’य् उडान यायेगु योजना दयेकूगु दु । आः भैरहवां नियमित उडान यानाच्वंगु नेपाल वायुसेवा निगम ९नेपाल एयरलाइन्स०या उडान ताः ई न्ह्यवंनिसें जुइ फयाच्वंगु मदु ।
येँ–मलेसिया व मलेसियां भैरहवा उडान यानाच्वंगु एयरलाइन्सं विमानया अभवाय् उडान स्थगित यायेमाःगु धाःगु दु । गौतमबुद्ध विमानस्थलय् थीथी चार्टर्ड उडान सञ्चालन जुयाच्वंगु दु । प्राधिकरणया सुचं अधिकारीं भूलं विन्टर सिजनपाखें थाई एयर एसिया व जजिरा एइरलाइन्सं नियमित उडान याइगु विश्वास प्वंकादिल ।
जजिरां आः कुवेतं येँय्तक उडान याना वयाच्वंगु दु । भैरहवां जजिरा व पोखरां सिचुवान एयरलाइन्सं उडान न्ह्याके धुंकाः निगूलिं विमानस्थलय् मेमेगु विदेशी वायुसेवात नं आकर्षित जुइगु प्राधिकरण्या विश्वास दु ।
जजिरां थ्वसिबें न्ह्यवं निक्वः तक भैरहवापाखें उडान यायेधुंकूगु दु । विसं २०७९ फागुणय् निक्वःगूखुसिइ उडान न्ह्याकूगु थुगु विमानसेवां उकिया लिपा निलात्या उडान यानाः प्राविधिक समस्या क्यंसें उडान स्थगित याःगु खः । एयरलाइन्सं हाकनं नियमित उडान न्ह्याके त्यंगु खः ।
पोखरा व भैरहवाय् उडान याइगु विदेशी वायुसेवायात सरकारं बांलाःगु छ्यापं सुविधा नापं बियाः वयाच्वंगु दु । आः थनं जुइगु अन्तरराष्ट्रिय उडानपाखें वइगु पूवंकं शुल्क छ्यापं बियाच्वंगु दु । नेपाल वायुसेवा निगमं बिइगु ‘ग्राउन्ड ह्यान्डलिङ’ सेवाय् मुक्कं २५ प्रतिशत बाहेकं मेगु छुं नं शुल्क पुलेम्वाः । थ्व निगू विमानस्थलपाखें जुइगु अन्तरराष्ट्रिय उडानया छ्यापं व सहुलियत सरकारं २०८१ साउन २८ निसें बिइगु याःगु खः । सरकारं ‘नागरिक उड्डयन ख्यःया मुक्कं सुधार लिसें गौतमबुद्ध व पोखरा अन्तरराष्ट्रिय विमानस्थल सञ्चालनसम्बन्धी कार्ययोजना’ कथं छ्यापं ब्यूगु खः । थ्व निगूलिं विमानस्थलया अन्तरराष्ट्रिय उडानया निंतिं हवाई टिकसय् तूगु म्हतिं स्वद्वः तका यात्रु सेवा शुल्कय् छ्यापं दु ।
थुपिं निगूलिं विमानस्थलया अन्तरराष्ट्रिय उडानय् पार्किङ व न्याभिगेसन शुल्कय् पूवंकं व नेपाल एयरलाइन्सं बिइगु ग्राउन्ड ह्यान्डलिङ सेवाय् ७५ प्रतिशत छ्यापं बियातःगु दु ।