म्युजिक भिडियोया ख्यलय् लोकंह्वाना वयाच्वंपिं निम्ह शाक्य कलाकार राष्ट्रिका व अनुजया जोडिं म्हितादीगु व किपूया नांजाःम्ह म्येहालामि रत्नशोभा महर्जन व राजेश महर्जन नेवाः नं हालादीगु “का नु वने जिम्थाय् मैंचा” म्यूजिक भिडियो शनिवार पितब्वज्या जूगु दु । किपूया पांगाय् च्वंगु कीर्तिपुर सिनेप्लेक्स हलय् जूगु “का नु वने जिम्थाय् मैंचा” ज्याझ्वः किपूया १ वडाय् च्वंगु थांबहाः दाफा खलःया कजि लिसें किपू नगरया पुलांम्ह नगर प्रमुख रमेश महर्जनया सभापतित्वय् जूगु खः । थांबहाः दाफा खलः व नेवाः लहना किपूया ग्वसालय् जूगु “का नु वने जिम्थाय् मैंचा” म्यूजिक भिडियो पितब्वज्या ज्याझ्वलय् म्येहामि राजेश महर्जन नेवाःया गुरुपिं थांबहाः दाफा खलःया दाफा म्ये गुरु चक्रमान महर्जन व बाजं गुरु चिरिभाई महर्जन “हाकुम्ह गुरुबा”पिन्त गाचां न्ययेकाः नगदलिसें तःजिक हनेज्या नं याःगु खः । ज्याझ्वलय् विशेष पाहाँ कथं बरिष्ठ संगीतकःमिलिसें संगीत अन्वेषक रामकृष्ण दुवाः, लोककवि राजभाई जकःमि, बरिष्ठ संगीतकःमि जुजुकाजी रंजित, किपूया बरिष्ठ संगीतकःमि ज्ञानेश्वर निभाः, नेवाः लहनाया नायः राजमान मानवलिसें न्हापांम्ह नेपालभाषा सिने पत्रकारलिसें समीक्षक विजयरत्न असंबरेंपिं उपस्थित जुयादीगु खः । कलाकार राष्ट्रिका शाक्य व अनुज शाक्यया मू भूमिका दुथ्याःगु “का नु वने जिम्थाय् मैंचा ” पितब्वज्या लिपा समीक्षक विजयरन्त असंबरें उगु म्यूजिक भिडियोया समीक्षा यानादीगु खःसा सभानायः रमेश महर्जनं थःगु नुगःखँ तसें ज्याझ्वः क्वचायेकादीगु खः । “का नु वने जिम्थाय् मैंचा” म्यूजिक भिडियो ज्योति म्यूजिकया युट्युब च्यानलय् अपलोड जूगु दु । थुगु “का नु वने जिम्थाय् मैंचा” म्यूजिक भिडियोया निर्देशक राजन शाही खःसा सम्पादन व छायाँकनया ज्या मनोजरत्न शाहीं यानादीगु दु ।