जरिमैंया व कुमार साखः सिरपा लःल्हागु ज्याझ्वलय् मिसा साहित्यकार तयेगु कविता वाचन

ख्वपःदेयया नांजागु साहित्यिक संस्था नेपाल साहित्य मन्दिरया ग्वसालय् दँयदसं बियावया च्वंगु जरिमैंया साखः लुमन्ति सिरपा व कुमार साखः लुमन्ति हःपाः सिरपा शनिबार लःल्हाःगु दु । नेपालभाषाया साहित्यख्यलय् ज्वमदुगु योगदान बियावया च्वंम्ह छम्ह मिसा साहित्यकार यात बिइगु जरिमैंया साखः लुमन्ति सिरपा थुगुसिइ सुलोचना मानन्धरयात लःल्हाःगु दु । उकिया नापनापं छम्ह मिजं साहित्यकार यात बिइगु कुमार साखः हःपाः सिरपा थुगुसिइ विजयरत्न असंबरेयात बिउगु दु ।
शनिबार ख्वपया सिद्धिपोखरी पार्टी पालेसय् जुउगु छगू ज्याझ्वलय् वयकपिन्त नगद दाँलिसें हना पौ देछाःगु खः । उगु ज्याझ्वलय् नेपाल साहित्य मन्दिरया संस्थापक नांजाम्ह साहित्यकार तिलक प्रकाश कायस्थ मूपाहाँ कथं झायादीगु खः । ग्वसाखलःया नायः प्राज्ञ त्रैलोक्यमान बनेपालीया सभापति जुयादीगु उगु ज्याझ्वलय् सिरपाया मू खँयाबारे ग्वसाखलःपाखें सभानायः अगिबं जानकारी बियादिल । वहे ज्याझ्वलय् पाल्पा तानसेनया नांजाम्ह भाषाह्यःमि वरिष्ठ भाषिक अभियन्ता छत्र राज शाक्ययात विशिष्ट साहित्य सम्मान ११४५ नं देछाःगु खःसां वयक धासा स्वास्थ्य स्थितिया कारणं ज्याझ्वलय् झायामदि ।
ज्याझ्वलय् मूपाहाँ तिलक प्रकाश कायस्थ, नांजाम्ह व्यवसायी कृष्णलाल प्रधान, विराट गुथिया नायः व नेपालभाषा एकेडेमीया सदस्य सचिव महेन्द्र गोपाल कर्माचार्य या नापनापं सिरपा लःल्हाना कयादीपिं सुलोचना मानन्धर धिताल व विजयरत्न असंबरे लगायतया व्यक्तित्वपिन्सं नुगःखँ तयादीगु खः ।
ग्वसाखलःया रामनारायण प्रजापतिं लसकुस यानादीगु उगु ज्याझ्वलय् उत्तम नारायण प्रधानं सुभाय् न्वचु तयादीगु खः । ज्याझ्वलय् कविताया लायकु व मिसा साहित्यकार मुना पाखें सुलोचना साँयजु , हिसिलिना शाक्य , रहिना नकःमि मानन्धर, बिनिता खडगी, बिना नेमकुल , मन्जु श्रेष्ठ सिंह , मिमला शर्मा, पुर्णिमा शाक्य, दिव्या बज्राचार्य,विमला मानन्धर,मिलन शाक्य,रिता महर्जन व नांजाम्ह कवयत्री प्रतिसरा सायमि पिन्सं कविता न्यंका दीगु खः ।