संयुक्त राज्य अमेरिकाय् नेवा: तजिलजि म्वाका तयेगु कुत:कथं नेवा: नख: न्यूयोर्कया ग्वसालय् गुक्वःगु इही मुना ज्याझ्व: क्वचाःगु दु । नेपाल सम्वत ११४५ दिल्लाथ्वः एकादशी, आइतबार (२०२५ जुलाई ६) कुन्हु ज्याक्सन हाइट्सय् च्वंगु शेर्पा किदुङ हलय् जूगु उगु समारोहय् अमेरिकाया प्यंगू राज्य– न्यूजर्सी, म्यासाचुसेट्स, ओहियो व न्यूयोर्कपाखें ६ म्ह मिसामस्त लूनिभाः श्रेष्ठ, ग्रेश प्रधान, गियाना तुलाधर, मेलानी तुलाधर, लीला श्रेष्ठ, अनन्या प्रधानपिन्सं ब्वति काःगु खः ।
समन्त श्री बज्राचार्य गुरुजु व पुष्पा बज्राचार्य गुरुमां जुयाबिज्याःगु उगु इही मुना ज्याझ्व: संस्थाया मूछ्यान्जे तुलसी नारायण चित्रकारं न्ह्याकादीगु खःसा ज्याझ्वलय् उपस्थित सकल सहभागी व पाहांपिन्त संस्थाया न्हापांम्ह न्वकू श्रुति अमात्यं लसकुस यानादीगु खः । ज्याझ्वलय् संस्थाया निवर्तमान नायः महेन्द्र वीर बज्राचार्यं संस्थाया स्थापना व उद्देश्य बारे ध्वाथुइका दिसें थ्व संस्था सन् २०११ स न्यूयोर्कय् नेवाः नखःचखः, परम्परा, तजिलजि व कला संस्कृतिया संरक्षण व प्रवर्द्धन यायेगु निंतिं नीस्वनागु खँ कनादिल । वय्कलं अमेरिकाय् जन्म जूपिं झी मस्तय्त नेवाः संस्कृति, परम्परा, कला व भाय् स्यनाः झीगु संस्कृतिया निरन्तरता कायम यायेमाःगु आवश्यक जूगु खँय् बः बियादिल । व धुंकाः संस्थाया कार्यकारी दुजः, मचाया मांअबु, पाहां, अले अन उपस्थित सकलें मिसा मचापिनि म्हसीकाया ज्याझ्वः नं जूगु खः । म्हसीकाया झ्वलय् छेँय् थें पारिवारिक वातावरणय् विदेशय् नं मिसामचाया ज्याझ्वः न्ह्यब्वये खंगुलिं मिसामचाया मांबौपिन्सं तसकं लसता प्वंकूगु खः । ज्याझ्वलय् दांभरिं सलोनी वन्त श्रेष्ठ, ल्यू दांभरिं मेनी श्रेष्ठ, दुजः नम्रता प्रधानपिन्सं उपस्थिति दर्ता यानादीगु खः ।
नेवा: नखः: न्यूयोर्कया नायः डा. नरेश मान शाक्य, न्हापांम्ह न्वकू श्रुति अमात्य, निम्हम्ह न्वकू महेन्द्रकुमार बज्राचार्य, मू-छ्यान्जे तुलसी नारायण चित्रकार, दांभरिं सलोनी वन्त श्रेष्ठ, व सल्लाहकार महेन्द्र बीर बज्राचार्यजुपिन्सं ज्याझ्वलय् ब्वति काःपिं मिसामस्तय्त हनापौ लःल्हानाः भिंतुना व लसहना द्यछाःगु खः ।
संस्थाया मिसा दुजःपिं श्रुति अमात्य, शालोनी वन्त श्रेष्ठ, मेनी श्रेष्ठ, नम्रता प्रधान, उजिला प्रधान, लघु श्रेष्ठ, लक्ष्मी शोभा चित्रकार, अनिता बज्राचार्य, मोहिनी कर्माचार्य, कल्पना प्रधान नापं मेमेपिं कमला प्रधान, पुष्पा बज्राचार्यपिन्सं मिसामस्तय्त थुगु ज्याझ्वःया निंतिं मूलुखांनिसें लसकुस यासें इहीया पुजा सामाग्री, खेँय्सगं व थाय्भु नं दयेका दीगु खः ।
गुभाजु समन्त श्री बज्राचार्यं इहीया महत्वया खँय् ब्वति काःपिन्त कनाबिज्याःगु खःसा संस्थाया नायः डा. नरेशमान शाक्यं थुकिया थीथी चरणय् पुजाय् छ्यलीगु थीथी हलंज्वलं गुकथं छ्यलेगु धकाः ध्वाथुइका दीगु खः । नापं संस्थाया निम्हम्ह न्वकू महेन्द्रकुमार बज्राचार्य, छ्याञ्जे अनित श्रेष्ठ, दुजःपिं जिवेन्द्र प्रधान, लघु श्रेष्ठ, अनिता बज्राचार्य, लक्ष्मीशोभा चित्रकारपिन्सं थुगु पुजाया थीथी चरण क्वचायेकेत ग्वाहालि यानादीगु खः । ज्याझ्वलय् दुजःपिं किरण रञ्जित, सविना शाक्य, दीपक प्रधान, अभिषेक छ्वचुं, पुष्प श्रेष्ठ, मुनिन्द्र बज्राचार्य, जीवेन्द्र प्रधानपिन्सं समय्ज्वलंया व्यवस्थापन यानादीगु खः । अथे हे तुलासा चित्रकार, रोहन चित्रकार, साइमन शाक्य, सायम श्रेष्ठ, इप्सा रजक, ऐश्वर्या श्रेष्ठ, पारसपिन्सं स्वयंसेवकया रुपं ग्वाहालि यानादीगु खः ।
न्यूयोर्कय् जुइगु नेवाः परम्परागत समारोहपाखें अभिभावक व मिसा मस्त लाभान्वित जुइगु, अले थुज्वःगु ज्याझ्वलं विदेशय् नं मौलिक नेवाः संस्कृति व परम्पराया संरक्षण व प्रवर्द्धन यायेत ग्वाहालि जुइगु धकाः संस्थाया वर्तमान नायः व सल्लाहकार विष्णुमान प्रधानं जानकारी बियादीगु दु ।
ज्याझ्वःया लिपतय् नेवाः नखः न्यूयोर्कया नायः डा. नरेशमान शाक्यं ज्याझ्वलय् ब्वति काःपिं सकलसित सुभाय् द्यछासें ब्वति काःपिं मिसामचापिनिगु उज्ज्वल भविष्यया कामना यानादिल । वय्कलं अमेरिकाय् च्वनाः नं थुज्वःगु महत्वपूर्ण संस्कारयात संस्थागत यायेखंगुलिं गर्व प्वंकादिल ।