प्रधानमन्त्री केपी शर्मा ओली यूराेपेली देय् स्पेनया औपचारिक भ्रमणया निंतिं नेपाली प्रतिनिधिमण्डलया नेतृत्व यासें वइगु शनिवाः उखे झायेत्यंगु दु । वय्कलं स्पेनया औपचारिक भ्रमणया झ्वलय् अन थ्वहे असार १६ निसें १९ गतेतक जुइत्यंगु ‘विकासया निंतिं वित्तसम्बन्धी प्यक्वःगु अन्तर्राष्ट्रिय सम्मेलन’य् ब्वति कयादी।
प्रधानमन्त्रीया औपचारिक भ्रमणया फुक्क तयारी पूवंगु व लसकुस यायेत स्पेनय् च्वंपिं नेपाली समुदाय उत्सुक व उत्साहित जूगु स्पेनया नितिं नेपाली राजदूत शनिल नेपालं राससयात जानकारी बियादीगु खः ।
भ्रमणया झ्वलय् प्रधानमन्त्री ओलीं थः समकक्षीलिसे निगू पक्षीय भेटवार्ता याइगु जूगु दु । उगु अवसरय् नेपाः व स्पेन दथुइ सहकार्य व स्वापू विस्तार सम्बन्धी छुं महत्वपूर्ण विषयस समझदारी पत्रय् ल्हाःचिं तयेगु ज्या नं जुइ ।
भ्रमणया झ्वलय् प्रधानमन्त्रीं अनया नेपाली समुदाय व स्पेनिस उद्योगीतलिसे नं अन्तक्रिया याइगु जूगु दु । सम्मेलनया झ्वलय् प्रधानमन्त्रीया मेमेगु महत्वपूर्ण निगू पक्षीय भेटवार्ता नं जुइगु दूतावासं न्ह्यथंगु दु ।
स्पेन संसदीय लोकतन्त्र व संवैधानिक राजतन्त्र दूगु पश्चिमी युरोपेली देय् खः। करिब ५ लख ५ हजार ९९० वर्ग किलोमिटर क्षेत्रफलय् लाःगु स्पेनया जनसंख्या करिब ४ करोड ७४ लाख दु ।
सन् १९८६ य् युरोपेली संघया दुजः जूगु स्पेन सन् १९९५ य् शेन्जेन क्षेत्रय् दुहां वःगु खः । स्पेनय् ८४ प्रतिशत स्पेनिश, १.७ प्रतिशत मोरक्को, १.२ प्रतिशत रोमानियाली व १२.३ प्रतिशत मेमेगु जातीय समूह दु ।
स्पेन छगू थुज्वःगु देय् खः गुकी तःधंगु व चिधंगु २० द्वः फुटबल क्लब दु, अले १० लख कासामि दर्ता जूपिं दु । भाषाया ल्याखं स्पेनिश भाय् हलिमय् दकलय् अप्व ल्हाइगु भाषाय् प्यंगूगु थासय् ला।
नेपाल–स्पेन दाैत्य सम्बन्ध
सन् १९६८ मे १३ य् नेपाः व स्पेनदथुइ कूटनीतिक स्वापू स्थापित जूसां सन् २०१८ य् जक अन नेपाःया आवासीय दूतावास पलिस्था जूगु खःसा स्पेनया दूतावास थन मदुगुलिं दिल्लीइ च्वंगु दूतावासं नेपाःयात स्वयाच्वंगु खः । स्पेनय् थ्यंमथ्यं २० द्वः नेपाःमि थीथी पेशा व व्यवसायय् संलग्न जुयाच्वंगु अनुमान दु । इपिं मध्यय् अप्वः धइथें कृषि, होटल, पर्यटन, निर्माणय् संलग्न जूगु रिपोर्ट वःगु दु ।
नेपाः व स्पेनदथुइ न्हापांनिसें हे उच्चस्तरीय भ्रमण आदानप्रदान जुयाच्वंगु दु । तत्कालीन जुजु वीरेन्द्र सन् १९८३ य् स्पेन भ्रमण याःगु खःसा तत्कालीन जुजु कार्लोस नं सन् १९८७ स च्यान्हु नेपाः भ्रमणय् झाःगु खः ।
तत्कालीन प्रधानमन्त्री पुष्पकमल दाहाल ‘प्रचण्डं’ सन् २०१६ य् स्पेनय् जूगु ‘द्वन्द्वय् लानाच्वंपिं व्यक्तिया तस्करी सम्बन्धी उच्चस्तरीय बहस’य् ब्वति काःगु खःसा अथे हे तत्कालीन संचारमन्त्री गोकुल बास्कोटां सन् २०१९ य् स्पेनय् जूगु मन्त्रीस्तरीय जीएसएमए ज्याझ्वलय् ब्वति काःगु खः ।
पूर्वराष्ट्रपति विद्यादेवी भण्डारीं सन् २०२१ स स्पेन भ्रमण याःगु खः । उगु अवसरय् नेपाः व स्पेन दथुइ जलवायु परिवर्तन व पर्यटनया क्षेत्रय् सहकार्य यायेगु सम्झौता जूगु खः । वैदेशिक रोजगारीया ल्याखं स्पेन नेपाःमितय् निंतिं न्हूगु गन्तव्य जुयाच्वंगु दु। स्पेन विश्वया हे पर्यटकीय गन्तव्य जुयाच्वंगु दु । थुकिया आयस्रोतय् पर्यटन छगू महत्वपूर्ण क्षेत्र खः ।
दँय् १२ करोड ५० लाख पर्यटकत स्पेनय् चाहिउ वइगु तथ्यांक दु । अथेहे, सन् २०१८ य् स्पेनं १९ हजार ५६३ म्ह पर्यटक नेपाः भ्रमणय् वःगु खःसां कोभिड–१९ लिपा छुं भचा म्हो जूगु दु ।
नेपाःया भौगोलिक अवस्थिति, प्राकृतिक सौन्दर्य, ज्वः मदुगु सांस्कृतिक सम्पदा व विविध पर्यटकीय आकर्षणया कारणं स्पेनिश पर्यटकतय्त आकर्षित यायेगु तःधंगु सम्भावना दु । अनुकूल जलवायु व साहसिक पर्यटन, आध्यात्मिक चिन्तन, ध्यान व योगया नितिं नेपाः छगू उपयुक्त गन्तव्यया रुपय् नांजाः ।
नेपाःपाखें जुइत्यंगु थ्व उच्चस्तरीय भ्रमणं स्पेन लगायत युरोपेली देय्या पर्यटकतय्त नं नेपाःया बारे सीकेत बल्लाःगु आधार दइगु विश्वास याःगु दु ।