नेपाली कांग्रेसया केन्द्रीय दुजः डा शेखर कोइरालां पार्टीया महाधिवेशन विसं २०८३ मंसिरदुने जुइमाःगु खँय् बः बियादीगु दु ।
नेपाली कांग्रेस तनहुँ जिल्ला ज्यासनापुचलं थौं ग्वसाः ग्वःगु कार्यकर्ता नापलायेगु ज्याझ्वःयात सम्बोधन यानादिसें वय्कलं पार्टीया महाधिवेशन क्वःछिनातःगु इलय् जुइमाः धयादिल ।
वय्कलं धयादिल, “जि पार्टीया महाधिवेशन क्वःछिनातःगु इलय् जुइमाःगु पक्षय् दु, नेपाली कांग्रेसया महाधिवेशन गुलि लिबात, उलि हे पार्टीयात बांलाइ मखु ।”
नेता कोइरालां २०८४ या आमनिर्वाचन न्ह्यः महाधिवेशन जुइमाःगु खँय् बः बियादिल । स्थानीय, प्रदेश तह व सङ्घीय निर्वाचन इलय् जुइगु जुगुलिं उकियात बिचाः यानाः न्ह्यायेत नेता कोइरालां इनाप यानादिल ।
न्हापा नेपाली कांग्रेसया बल्लागु साङ्गठनिक जिल्लाया कथं तनहुँ जुयाच्वंगु जुसां आः अजागु अवस्था मदुगुलिं थुखेपाखे बिचाः यायेत वय्कलं सकल नेताकार्यकर्तायात इनाप यानादिल ।
तनहुँया नेता रामचन्द्र पौडेल राष्ट्रपतिइ निर्वाचित जुयादीगुलिं थ्व जिल्लाया परिस्थिति हिलेधुंकुगुलिं आः थनया नेतृत्वं न्हू कथं न्ह्यावनेमाःगु कोइरालाया धापू दु ।
दुजः न्हूधाःया सन्दर्भय् छुं मचा मगाः जूगु जुसा वडास्तरय् थ्यंकाः कार्यकर्तायात थुइकेमाः धयादिल ।
वय्कलं धयादिल, “जिल्लाया वरिष्ठ पासापिं वडास्तरय् वनाः कार्यकर्तायात थुइकाः दुजः न्हूधाः यायेगु पाखे न्ह्यचिले माः ।”