राष्ट्रियसभाया थौंया बैठकं प्रतिनिधिसभापाखें सन्देशनापं वःगु विनियोजन विधेयक, २०८२ कय् विचार यायेमा धइगु प्रस्ताव बहुमतं स्वीकृत जूगु दु ।
व स्वयांन्ह्यः उगु प्रस्तावय् जूगु सैद्धान्तिक सहलहय् सांसदतय्सं थंगु न्ह्यसःया लिसः बियादिसें उपप्रधान नापं अर्थमन्त्री विष्णुप्रसाद पौडेलं बजेट कार्यान्वयनमुखी व सन्तुलित जूगु धयादिल ।
वय्कलं बजेट यथार्थपरक व बजेटया अनुमानं लिच्वः वयेफयेमा धकाः मन्त्रालयं ध्यान बियाच्वंगु न्ह्यथनादिल ।
उपप्रधानमन्त्री पौडेलं न्यायपूर्ण विनियोजनया पक्षय् च्वनाः बजेट वःगु दाबी यानादिल ।
वय्कलं धयादिल, “थ्व बजेट कार्यान्वयन जुइगु आधारलिसें वःगु दु । बजेटया धं निर्माण यानाबलय् स्रोत व्यवस्थापनयात व्यवहारिक जुइक संयमित व सन्तुलित जुइकूगु दु, बजेट निर्माणय् अनुशासन पालना जूगु दु ।”
उपप्रधानमन्त्री पौडेलं बजेट कार्यान्वयन अर्थ मन्त्रालयया जक मखुसे मुक्कं मन्त्रालयया मंकाः भाला जूगु धासें सकसिनं भाला कयाः बजेट कार्यान्वयनय् यंकेमाःगुलिइ बः बियादिल ।
उगु प्रस्तावय् जूगु सैद्धान्तिक सहलहय् राष्ट्रियसभा दुजःत उर्मिला अर्याल, पदमबहादुर परियार, गोपाल भट्टराई, शेखरकुमार सिंह, भुवनबहादुर सुनार, तुलसा दहाल, गोपीबहादुर सार्की अछामी व सुमित्रा बिसीं धारणा प्वंकादिल ।
सभाया मेगु बैठक थ्व हे असार १५ गते आइतबाः न्हिनेसिया १२ ताः ई पुलाः १५ मिनेटय् च्वनी ।