खानेपानीमन्त्री प्रदीप यादवं नेपालय् दन्त चिकित्सकया आवश्यकता, महत्व व माग यक्व दूगुलिं दक्ष जनशक्ति उत्पादन यायेमाः धयादीगु दु ।
थौं येँया पिपल्स डेन्टल कलेज एन्ड हस्पितलं कलेजया प्रमुख संस्थापक तीर्थरत्न बज्राचार्यया २२ क्वःगु वार्षिक पुण्यतिथिया लसताय् ग्वसाःग्वःगु ज्याझ्वलय् मन्त्री यादवं नेपालय् दन्त स्वास्थ्य सेवाया आवश्यकता न्हियान्हिथं अप्वःया वयाच्वंगु व दन्त चिकित्सकया भूमिका अझं महत्वपूर्ण जुयाः वयाच्वंगु दु धयादिल ।
मदुम्ह बज्राचार्यया योगदानया उच्च मूल्याङ्कन यानादिसें मन्त्री यादवं मदुम्ह बज्राचार्यं नेपाली दन्त चिकित्सक शिक्षाया जग स्वनेगु ज्या यानादीगु व वय्कःया योगदान थौं नं लुमंकेबहःजु धयादिल ।
जनता समाजवादी पार्टीया सङ्घीय परिषद् अध्यक्ष राजेन्द्रप्रसाद श्रेष्ठं दन्त स्वास्थ्य सचेतना अभिवृद्धि, ग्रामीण क्षेत्रय् सेवा विस्तार व दन्त चिकित्सक शिक्षाय् गुणस्तर तब्याकेगु निंतिं सरोकारवाला निकाय दथुइ मंकाःज्या जुइमाःगु खँय् बः बियादिल ।
पिपल्स डेन्टल कलेज एन्ड हस्पिटलया प्रमुख कार्यकारी अधिकृत भीमबहादुर चन्दं पिपल्स डेन्टल कलेज एन्ड हस्पितलय् एमबिबिएस ब्वंकेगु निंतिं भौतिकलिसें मेमेगु प्रक्रिया न्ह्याकूगु जुसां आःतक अध्यापनया निंतिं अनुमति कायेमखंगु धयादिल ।
ज्याझ्वलय् बागमती प्रदेशसभा दुजः शैलेन्द्र बज्राचार्य, खानेपानी लिसें धः व्यवस्थापन विभागया महानिर्देशक इञ्जिनियर रामकुमार श्रेष्ठ, पिपल्स डेन्टल कलेजया नायः विद्याभूषण बज्राचार्य, सेयर होल्डर शहनशीला बज्राचार्य, प्रबन्ध निर्देशक रोशन लुइँटेल, प्राचार्य प्रा डा सुरेन्द्रकुमार श्रेष्ठ, विद्यार्थी व थीथी स्वास्थ्य ख्यःया प्रतिनिधितय् उपस्थिति दूगु खः ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।