नेपाल कम्युनिष्ट पार्टी (माओवादी केन्द्र)या नायः पुष्पकमल दाहाल ‘प्रचण्डं’ समाजवादी क्रान्ति न्हूगु चरणय् यंकेत पार्टीं म्हिगःया गल्ती व कमजोरीत भिंकाः जनतानापं हाकनं स्वायेगु अभियान न्ह्याका च्वनागु धयादीगु दु ।
थौं ग्वसाः ग्वयातःगु पार्टी प्रवेश ज्याझ्वलय् वय्कलं माओवादी केन्द्र सुशासन, सामाजिक न्याय व समृद्धिया अभियानय् दूगु धयादिल ।
वय्कलं धयादिल, “समाजवादी क्रान्तियात न्हूगु चरणय् यंकेत पार्टीं म्हिगःया गल्ती व कमजोरीयात भिंकाः जनतानाप हाकनं स्वायेगु अभियान न्ह्याकाच्वनागु दु, थ्व अभियानय् स्वायेत जि सकसितं इनाप नापं यानाच्वनाः ।”
अशोक राई नेतृत्वया जनता समाजवादी पार्टी (जसपा) परित्याग याःपिं कर्णाली प्रदेशया नायः देवीकृष्ण न्यौपानेलिसें जसपा कर्णालीया नेता नापं कार्यकर्तातय्त पार्टीइ लसकुस यानादिसें वय्कलं उगु पार्टी प्रवेश व समायोजनं पार्टीया अभियानय् थप ऊर्जा लिसें उत्साह दइगु विश्वास प्वंकादिल । लिसें नायः दाहालं माओवादी केन्द्रप्रति आकर्षण अप्वया वयाच्वंगु दु धयादिसें पार्टीइ समायोजन जू वइपिंत पाय्छिगु भाला बिइगु धयादिल ।