चलचित्र पत्रकार संघ नेपालया २६ क्वःगु स्थापना दिवस संघया केन्द्रीय समितिया ग्वसालय् नेपाःया चिया राजधानी कथं नांजाःगु इलामय् जूगु दु । उगु हे लसताय् जूगु छगू ज्याझ्वलय् ७ म्ह संकिपा पत्रकारपिन्त सम्मान व सिरपाः लःल्हाःगु दु । चलचित्र पत्रकार संघ नेपाल कोशी प्रदेश शाखा व चलचित्र पत्रकार संघ नेपाल, इलाम, झापा, मोरङ व सुनसरी शाखाया संयोजकत्वय् इलामया श्री अन्तुइ जूगु चलचित्र पत्रकारपिनिगु राष्ट्रिय भेलाय् उमित हना व सिरपाः देछाःगु खः ।
उगु मुँज्याय् पत्रकार ध्रुव लम्सालयात राष्ट्रिय चलचित्र पत्रकारिता रजत पुरस्कार, विष्णु सुवेदीयात राष्ट्रिय चलचित्र पत्रकारिता पुरस्कार, नरेन्द्र बस्नेत (कोशी)यात राष्ट्रिय चलचित्र पत्रकारिता पुरस्कार, जीवनकुमार पराजुलीयात राष्ट्रिय चलचित्र पत्रकारिता पुरस्कार, वर्षा बस्नेतयात राष्ट्रिय चलचित्र पत्रकारिता पुरस्कार लःल्हाःगु खः। रजत सिरपाः त्याकूपिं पत्रकारपिन्त ५५ हजार ५५५ तका दां लःल्हाःगु खःसा पत्रकारिता सिरपाः त्याकूपिं पत्रकारपिन्त ५१ द्वः तका सिरपाः लःल्हाःगु खः ।
अथे हे पत्रकार रश्मि थापायात राष्ट्रिय चलचित्र पत्रकारिता प्रोत्साहन पुरस्कार व तुलसीप्रसाद निरौला (कोशी)यात राष्ट्रिय मोफसल चलचित्र पत्रकारिता पुरस्कार लःल्हाःगु खः । प्रोत्साहन सिरपाः व मोफसल पत्रकारिता सिरपाः २५ हजार तका बराबरया खः ।
सिरपाः त्याकूपिंत चलचित्र विकास बोर्डया नायः दिनेश डिसी, कलाकार बसुन्धरा भुसाल, नायक शिब श्रेष्ठ, कलाकार गौरी मल्ल, नेपाल चलचित्र कलाकार संघया नायः मोहन निरौला, नेपाल चलचित्र निर्देशक समाजया नायः दिनेश पराजुली, संघया पुलांम्ह नायः जनकदीप पराजुली व वर्तमान संघ अध्यक्ष समीर बलामीपिसं हना व सिरपाः लःल्हाःगु खः ।
उगु भेलाय् सिनेमा पर्यटन महोत्सव कार्यशाला, मिडिया मन्थन सिनेमा संवाद व अन्तरक्रिया जूगु खःसा थौं व्यापक चलचित्र पत्रकारिता कार्यशाला व सिनेमा संवाद जुइगु संघया महासचिव रघुनाथ सापकोटां जानकारी बियादीगु दु ।