संसारया हे दकलये ताहाकःगु अप्वः विधाय् सिरपा लःल्हागु कथं वर्ल्ड रेकर्ड तयेगु कुतः जुया च्वंगु संसार नेशनल स्टार म्युजिक भिडियो अवार्ड ११४५ शनिवार नेपाल प्रज्ञा प्रतिष्ठानया हलय् क्वचाल । बहुमुखी प्रतिभाया धनी कलाकार स्वतन्त्र संसार महर्जन अध्यक्ष व क्रियटिभ डाइरेक्टर जुयादीगु संसार क्रियशन नेपालया ग्वसालय् जूगु उगु अवार्ड ज्याझ्वलय् बागमती प्रदेशया श्रम, यातायात तथा रोजगार मन्त्री प्रेम महर्जन मूपाहाँ कथं झायादीगु ज्याझ्वलय् लेखक, निर्देशक व साहित्य अन्वेषक प्रकाश सायमी, नेपाःया फिल्मख्यःया न्ह्यलुवाः कलाकारपिं रबिन्द्र खड्का, धिरेन शाक्य व सिमान्त उदास , गायिका देबिका बन्दना, गीतकारपिं भुषण खरेल, बुद्ध बीर लामा , साहित्यकार बिक्रम भक्त जोशी, नृत्य निर्देशक भुवनदास श्रेष्ठ लगायत विशेष पाहाँ कथं झायादीगु खः । उगु नेपालभाषा स्टार म्युजिक भिडियो अवार्डय् ३१ विधाय् सच्छि व न्हेयनिम्हेसित अवार्ड बिउगु खः ।
थ्व अवार्ड हलिमया दकलेसकले ताहाकःगु व अप्वः अवार्ड बिउगु कथं विश्व रेकर्ड गिनिज बुक अफ वल्र्डय् दुथ्याकेगु तयारी जुया च्वंगु दु । थ्व ज्याझ्वलय् नेपालभाषाया गीत–संगीत क्षेत्रय् जीवन पाना क्रियाशील जुयादीम्ह गायक व संगीतकार रत्न बेहासी बज्राचार्ययात नगद २५ हजार राशी सहित लाइफटाइम अचिभमेन्ट अवार्ड देछागु खः ।
अथेहेतुं नेपाली तथा नेपालभाषाया न्ह्यलुवा कलाकार पवन जोशीयात नगद १५ हजार तका दां सहित मल्टिमिडिया स्टार अवार्ड देछागु उगु अवार्डय् नेपालभाषा म्युजिक भिडियोया न्हापांम्ह निर्देशक विजयरत्न तुलाधर असंबरेयात सम्मान कथं अवार्ड देछागु खः । ललितपुर महानगरपालिका वडा नंबर १६ या वडा अध्यक्ष निर्मल रत्न शाक्ययात सर्वोत्कृष्ट गीतकार अवार्ड व काठमाडौं महानगरपालिका वडा नंबर १८ का वडा अध्यक्ष न्हुछेकाजी महर्जनयात गीतकार विधाय् जुरी अवार्ड बिउगु खःसा बागमती सफाई अभियानया अभियन्ता गीतकार बागमती भाइ सुन्दरमान श्रेष्ठयात गीतकार विधाय् पिपल्स च्वाइस अवार्ड बिउगु खः ।
थीथी ३१ बिधाय् प्रतिस्पर्धात्मक कथं अवार्ड बिउगु ज्याझ्वलय् न्ह्यलुवाः कलाकःमिपिं अाशाकाजी थकू,कृष्णभक्त महर्जन, संगीता शाक्य, जुगल डंगोल, रामकृष्ण खडगीयात संसार तेज बहादुर स्मृति अवार्ड देछागु खःसा सरस्वती मानन्धर, बुद्ध सायमि, रबि सायमि, अनिल तुलाधर, सुरेन्द्र मानन्धर, निशा देशार व बिश्वास बज्राचार्य यात संसार सप्तरंगी सम्मान देछागु खः ।
अथेहेतुं ज्याझ्वलय् बिशेष योगदान सम्मान कथं सोहन मानन्धर,किशोर कुमार शाही, बिजय मास्कि मगर, सबिना मानन्धर व रुखसाना महर्जनयात हंगु खःसा सामाजिक अभियन्ता राजाराम तण्डुकारयात संसार फेसबुक प्रोफाइल अवार्ड देछागु खः । बिराजकाजी राजोपाध्याय व प्रमिला सायमिं न्ह्याकुगु ज्याझ्वलय् यल वडा २१ या वडा अध्यक्ष रबिन्द्र महर्जनं लसकुस न्वचु तयादीगु खः ।